Йӧратыме еҥым пӧртылташ

Тиде историйым ковам каласкален. Тудын йолташ ӱдыржӧ ик рвезым чот йӧратен шынден. Ушыштыжо тудо гына лийын. Но Ивук вес ӱдырым ойырен налын. Тунам ковам ден Майра пошкудо ялыште илыше ик моштышо кува деке пырля каеныт.

Майра рвезым шкеж дек савыраш шортын-шортын йодын. «Йӧратымаш… Йӧратымаш… Чылан тидлан кӧра гына толыт. Мый савыркалыме пашам ом ыштыл. Мондо тудым», – каласен кова. Но Майра чакнен огыл. «Тугеже тек Ивук таҥже деч кораҥеш. А умбакыже мый шке шотым муам», – ойлен ӱдыр. «Ик йӧн уло. Но акше шерге лиеш. Иктаж-мом йомдарашет перна», – шижтарен кова. Но Майра мом йомдарен кертме нерген шоналтен огыл, ушыштыжо Ивук гына улмаш. Туддеч шерге мо лийын кертеш?!

Кова карандаш дене кагазеш ала-мом сӱретлен, семынже вудыматен, вара сортам ылыжтен да кагазым йӱлалтен. Пӧлем мучко шикш шарлен. «Кай, Ивукет таҥже деч кораҥеш, тудо пӱрымашыже огыл», – каласен кова.

Майра мӧҥгӧ куаныше пӧртылын. «Вашке чыла сай лиеш»,– шонен коштын. А икмыняр кече гыч Майруклан Ивукын таҥже деч ойырлымо нерген каласеныт. Но Майра утыжым куаненат огыл. Ковам тидлан чот ӧрын. Ала моштышо кова Майрукым шкенжым Ивук деч йӱкшыктарен манын шоналтен.

Икана ковам Майруклан Ивук деч кагазым конден пуэн. Тушто рвезе кастене ял мучаште вашлийын кутыраш ӱжын. Майра вашлияш сӧрен вашештен, но каяш монден. Ковамым тиде эше чот ӧрыктарен. А вара Майрук верч тургыжланаш тӱҥалын. Ӱдыр шкежат ковам деч лӱдын йодын: «Моштышо кова иктаж-мом йомдарет мане вет. Але вара ушем йомдарем?» Ковам тудым лыпландараш тӧчен. Но икмыняр жап гыч Майрукын чынжымак ушыжо пудыранен. Рвезым савырымыжлан тыгай шерге акым тӱлашыже пернен.

Анастасия.

Йошкар-Ола.