14 февральыште «Кугарня» газет ГУКП В.И.Ленин лӱмеш тӱвыра полатыште «Йӧратымашын уло юзо вий» лӱман черетан концертым эртарыш.
– Ик шӱм-тулшол ушна вес шӱмышкӧ –
Шочеш йӧратымаш.
Да илыш-корно мучко йӱлышӧ,
Эн ямле ты аршаш!
Тыге писатель Валентин Осипов-Ярчан почеламут корнылаж дене йӧратымашым чапландарыше муро пайрем кас тӱҥале. Кок шагат жапыште 26 сылне муро йоҥгалте.
Мурызо-влак йӧратыше кок айдемын кӧргӧ чон поянлыкшым, волгыдо шижмашын юзо вийжым сылнымут да сем гоч почын пуышт.
Концертым М.Шкетан лӱмеш марий кугыжаныш драмтеатрын артистше Иван Соловьев ден «Кугарня» газетын корреспондентше Ирина Александрова вӱдышт. Сылне сценарийым «Кугарня» газетын дизайнер-верстальщикше Татьяна Попова ямдылен.
Концертым сылнештареныт: Марий Элын сулло артистше-влак Анатолий Зарецких, Олег Славин, Нина Казашова, Марина Почтенева, Эльвира Попова. Мурызо-влак Родион Алексеев, Роза Искакова, Сергей Данилов, Валерий Петров, Вадим Краснов, Александр Коновалов, Марина Иванова, Валентина Семёнова, Сергей Пакеев, Полина Савельева, «Ошла сем» ансамбль.
Концертын организаторжо санитар службын вирус шарлыме деч шекланыме чыла йодмыжым шуктен: пурымаште QR-кодым тергыме, толшо уна-влаклан маскым яра пуэдыме.
Концерт ик шӱлыш дене эртыш. Пагален толшо артист-влаклан да ончаш толшо-шамычлан таум ойлена. Тек йӧратымашын юзо вийже кажнын чонышто ила.