Айдемын илышыже волгыдо шижмаш дене кылдалтын. Тиде йӧратымаш! Тудым огеш лий шылташ але луктын кудалташ, кевытыште налаш, пазарыште ужалаш, вӱд йогын дене мушкын колташ, пареҥге йыраҥеш ураш. Вот могай йӧратымаш!
Эх, йӧратымаш! Тый чыла ыштет: куандарет, ойгандарет, шортарет, шулдыраным ыштет. Тылат кӧра айдеме тӱняште ила, куана. Тый, лачак тый илышын куанже, илышын ямже улат. Чылажат лач тыланет кӧра ышталтеш. Пеледат, сылнештат, тӱзатет, айдемым вияҥдет.
Шочмеке изи икшыве, шке ача-аважым йӧраташ, нунын чон шокшыштым шижаш тунемеш. Кушкын шумеке, шӱмыштӧ шытыше шижмашыжым вес еҥлан пӧлеклаш кумылаҥеш. Тыге тудын икымше йӧратымашыже ылыжеш. Йӧратымаш – чон шижмаш, йӱдым омым пытарыше, кечывалым каныш деч посна кодышо. Тыгодым изи шӱм тунар йӱла, йӧратыме еҥ нерген эреак шоныкта. Ужат – куанет, йӱкшым колат – йывыртет. Изи кайык семын вычыматен колтет, пиаллан мучаш уке манын шонет. Тудак, лач тудак веле тыланет ты илышыште кӱлеш. Йӧратыме еҥ пелен лийнет, ончыкылык илышетым лач тудын дене чоҥынет. Кагазыш шӱмым сӱретлет. Йымалныже шкендын да тудын лӱмжӧ-влакым возет, ушымашым шындет. Шкеже моткоч йывыртет, пуйто илыш ончылнет. Вес семынже лийынат огеш керт.
Эх, йӧратымаш! Тыйым огеш лий мондаш, тый денет огеш лий модаш. Йӧратымашын уло юзо вий, кучен коден шылташ ок лий.
Южгунам йӧратымаш шинчавӱдым йоктара, кумылым волта, йӱд омым пытара. Кече арняла чучеш, арня тылзе гай лиеш. Тиде йыжыҥ моткоч ковыра, илыш вийым йомдара.
Йӧратымаш – кугу тӱня! Тудым тӱнямбал картыштат муаш огеш лий. Садлан волгыдым чоныштыда эреак аралаза да лишыл еҥдам тудын дене куандарыза!
Нинель.
Морко район.