14 февральыште Йӧратыше-влакын кечыштым палемдат. Йӧратыше еҥын кумылжо эреак поро, шинчаже йӱлышӧ. Чонышто тыгай шижмаш озаланыме годым лишыл еҥ верч чыла ышташ ямде улат, тудым тӱрлӧ семын куандараш тыршет, чӱчкыдын вашлияш ӱжат. Лудшына-влакын илышыштышт ойыртемалтше свиданий лийын мо? Кузе тудо эртен?
Вероника Мустаева, Йошкар-Ола, этноблогер:
– Мыйын, очыни, кажне свиданий ойыртемалтшын эртен. Молан манаш гын чӱчкыдын могай-гынат да томаша лиеден. Мутлан, нылымше курсышто тунеммем годым пытартыш мужыр деч ончыч йолташем йыҥгыртен да вич минутлан лекташ йодын. Уремыш лекмем годым, тошкалтышыште туныктышым вашлийынам да вашке толаш сӧренам, но пел шагатлан йомынам. Мыланем тунам занятийыш пӧртылаш моткоч намысын чучын, туге гынат толынам.
Вес гана таҥем дене лиймем годым тудлан ола воктенысе дачыж гыч ала-могай арверым налын толаш кӱлын. Тушко кудалшыла, лавыраш пижын шогалынна. Йӱдым дачыште эртараш логалын, пӧртым коҥгаш олтен ырыктенна. Эрдене рейсовый автобус дене олаш пӧртылынам, а келшыме рвезем машинажым кечывал эртен веле лавыра гыч луктын. Эх, мо гына лийын огыл…