14 февральыште Йӧратыше-влакын кечыштым палемдат. Йӧратыше еҥын кумылжо эреак поро, шинчаже йӱлышӧ. Чонышто тыгай шижмаш озаланыме годым лишыл еҥ верч чыла ышташ ямде улат, тудым тӱрлӧ семын куандараш тыршет, чӱчкыдын вашлияш ӱжат. Лудшына-влакын илышыштышт ойыртемалтше свиданий лийын мо? Кузе тудо эртен?
Анастасия Антонова, Йошкар-Ола, модель:
– Мыланем ятыр гана оҥай, ойыртемалтше свиданий-влакым эртареныт. Мый пӱртӱсыштӧ лияш моткоч йӧратем, садлан тыгай свиданий-шамыч утларак келшат да кужу жап чоныштем илат. Тыге палаточный лагерьыште, вертолёт дене каваште, яхтыште лийме вашлиймаш-влакым тачат куанен шарналтем. Ерысе, эҥерысе, теҥызысе сер воктене жапым веселан эртараш, пикникым организоватлаш моткоч сай йӧн. Очыни, тыгай свиданий-влак эн-эн улыт!