14 февральыште Йӧратыше-влакын кечыштым палемдат. Йӧратыше еҥын кумылжо эреак поро, шинчаже йӱлышӧ. Чонышто тыгай шижмаш озаланыме годым лишыл еҥ верч чыла ышташ ямде улат, тудым тӱрлӧ семын куандараш тыршет, чӱчкыдын вашлияш ӱжат. Лудшына-влакын илышыштышт ойыртемалтше свиданий лийын мо? Кузе тудо эртен?
Алёна Петрова, Морко район, студентке:
– Келшыме рвезем мыйым республикна мучко самолёт дене чоҥештен эртыме свиданийыш ӱжын. Тидыже тачат чонем шокшо кече семын ырыкта. Самолёт кӱшкӧ чоҥештен кӱзымӧ годым могыр коваштемлан копыж чучын, йырым-йыр тугай мотор, пуйто йомак тӱняште улат. Ме Шолэҥер посёлко гыч Свияжск отро марте чоҥештенна. Палемдыме верыш миен шуаш тӱҥалме годым мыланем ӱлыкӧ ончалаш манын. Туштыжо «Лек мыланем марлан» возымо лийын. Мутат уке, ӧрынам, чоныштем мо ышталтмым умыленат омыл. Таҥем деке савырнымеке, тудо мыланем шергашым ончыктен да пелаш лияш кӧнем але укем йодын. Шӱргем мучко куан шинчавӱд йоген, а парняштем мотор шергаш чолгыжын. Отрошто мемнам лишыл йолташна-влак вученыт. Тидын нергенат пален омыл. Нунын дене ты пиалан татым пырля пайремленна.