Кажне еҥын йӧратымашыже шкешотан, ойыртемалтше. Иктышт чонлан келшыше йолташым школышто тунеммышт годымак вашлийыт гын, весышт – жап шумеке. А ты жап кунам шумо шотышто тургыжланыман огыл, вет ик мотор кечын кок йӧратыше шӱм садыгак вашлиеш.
Лена ден Саша шым ияш улмышт годымак палыме лийыныт. Ик классыште тунемыныт. Латкок ияшыж годым Саша Леналан серышым возен. Туштыжо ӱдырлан шукертсек келшет манын чонжым почын. Кудымшо класс гыч ӱдыр ден рвезе утларак жапым пырля эртараш тӱҥалыныт. Кинош, книгагудыш, кевытыш коштыныт. Кандашымше классыш шумеке, ик парт коклаште шинчыныт. Пырля тунемше йолташышт-влак нуным ны шылтален, ны мыскылен огытыл. Туныктышо-влакат келшымышт нерген паленыт. Ты ийынак кок самырык йӧратыше еҥ кушкын шумекышт, сӱаным ышташ кутырен келшеныт. Рвезе ӱдырлан гайке гыч шергашымат пӧлеклен.
Школым тунем пытарымеке, Лена ик оласе вузыш тунемаш пурен. Олашке автобус дене ныл шагат утла кудалман. Саша мӧҥгӧ деч тораште огыл училищыште шинчымашыжым нӧлтен. Туге гынат ӱдыр-каче кок арнялан ик гана вашлияшак тыршен. Икана Лена толын гын, вес гана Саша олашке лӱмынак миен. Тора корно йӧратыше еҥ-влакым утларак веле лишемден. Тыге шижмашышт чотрак веле вияҥын.
Варажым Сашам армийыш налыныт. Кок ий жапыште Лена тудын деке кандаш гана ужаш миен. А толмекыже, идалык гыч школышто кутырен келшыме семынак сӱаным ыштеныт. Вашла шергашым чиктен, ӱмыр мучко йӧратен, пагален, аклен илаш товатленыт.
Лена ден Сашан школ годсо шижмашышт тачат пеҥгыде. Вате-марийым ончен, ятыр еҥ кӧрана. А мый гын нунын верч йывыртем гына. Изи годсек ик еҥ деке тыгай йӧратымашым аралаш талант кӱлеш. Тидлан, очыни, йӧратенжат моштыман.
Таня О.
Кужэҥер посёлко.