20 октябрь – Поварын тӱнямбал кечыже
Морко посёлкысо «Эрвий» кафеште поварлан тыршыше Марина Иванова тӱрлӧ кочкышым ямдылкалаш йӧратем, манеш. Лийже тиде кеч-могай салат але закуско, шокшо кочкыш але ӱяча. Уста еҥ чылажымат кумылын ышта.
Буфетчице гыч тӱҥалын
Марина Октябрьский посёлкышто шочын-кушкын. Тысе школ деч вара Йошкар-Оласе строительный техникумышто профессионал шинчымашым налын. Профессийже дене пашам муын огыл, садлан Морко райпосо общепит пелен буфетыште тыршаш тӱҥалын.
– Буфетчицылан икмыняр ий пашам ыштенам. 2019 ийыште Йошкар-Оласе торгово-технологический колледжыште поварлан курсым эртенам. Тылеч вара посёлкысо «Энсул» кочмыверым вуйлаташ шогалтеныт. Кум ий гыч «Эрвий» кафеште кугурак поварын сомылжым шукташ ӱшаненыт, – каласкала Марина.
Тудын ойлымыж почеш, повар чот ответственный еҥ лийшаш. Вет шканже огыл, а калыклан кочкышым ямдыла. Садлан личный гигиеным шуктымаш ты профессийыште эн тӱҥлан шотлалтеш. Сийым ямдылыме годымат чот тӱткӧ лийман, манеш. Повар палемда, кочкышыш шинчалым шавыме але кӱктымӧ, жаритлыме годым эреак эскерыман.
Кочкаш ямдылаш йӧрата
– Мый кочкаш ямдылаш моткоч йӧратем. Кеч-могай сийым кумылын ыштем. Эреак у рецептым кычалам, ик кочкышымак тӱрлӧ семын ямдылкалем. Ешемлан, мутлан, голубцы, фаршироватлыме шере пурыс, подкогыльо, борщ, тӱрлӧ начинкан мелна келшат. Но эн йӧратымышт – тиде борщ. Ты шӱрыш тутло тамым йошкарушмен пурта, садлан тудым шке жапыштыже пыштыман. А тидым шолтен пытарыме деч ончыч ышташ сайрак. Йошкарушменым пыштет, изи тулышто шолаш пурымешке шинчыктет да йӧртет. Пакчасаскам шолтыман огыл, тыгай шӱр тамле лиеш, – ойла повар.
Марина Иванован ойлымыж почеш, общепитыште кочкышым технологий почеш ямдылат. Кажне сийын – шке тамже да ойыртемже. Мутлан, салат тутло лийже манын, соусым ыштен моштыман. А когыльо чевер тӱсан да пушкыдо лийже манын, коҥгасе температурым, тудын ӱмбаке йыгыме смазкым, руашын кӱзымыжым шотыш налман.
Тыгак повар деч кызыт кафелаште могай кочкыш эн йодмашан, пален нальым. Калык ананас йымалне лу деч посна кӱктымӧ чыве шылым кочкаш йӧрата улмаш. Тудо менюшто уке гынат, йодыт, манеш специалист. Палемдынем, ты кафеште тыгак «Том Ямым» (тӱрлӧ морепродукт гыч ямдылыме шӱр) лач Марина Иванова гына ямдыла. Ты кочкышым самырык-влак поснак чот йӧратат. Садлан тудым кочкаш лӱмын толыт.
Кеч-могай профессийын шке ойыртемже, сай да уда могыржо. Повар лияшат куштылгыжак огыл. Тӱҥжӧ – пашаеҥлан тудо келшышаш. А Марина Ивановалан шуктымо сомылжо куаным конда, тугеже тудо – шке верыштыже.