Морко район Йошкарэҥер ялыште илыше В.Григорьеван окна ончылныжо тӱрлӧ росота одарланен кушкеш: помидор, пурыс, баклажан, кияр. Да эше икмыняр тӱрлӧ пеледыш.
Помидор, шере пурыс, кияр
– Помидор сорт-влак кокла гыч «Пузата хата», «Батяня», «Жаркие угли», «Медвежья лапа», «Дамский пальчик» келшат. Киярым «Герман», «Кураж», «Весёлые ребята», «Маленький гномик» сорт-влакым налам – изирак кияр урлык телылан мариноватлаш келшен толеш. Шере пурысым кок тӱрлым: йошкаргым да нарынчым – шындем.
Росотам ӱдаш «Живая земля» рокым лӱмын налам. Кажне росотам пеллитран посна атыш кусарен шындем. Февраль-мартыште кече пешыже ок ончо, садлан кушкыл шуйна. Тыгай годым фитолампым чӱктем. Варажым, шошо озаланаш тӱҥалмек, кече кужеммек, росота пеҥгыдемеш да виянрак кушкаш тӱҥалеш.
Вӱдым изин, но чӱчкыдын шавем. Тидлан вӱдым атыш ончылгоч темен шындем. Пӧлемысе температурымат шотыш налман. Помидор, кияр, пурыс баклажан шокшым йӧратыше кушкыллан шотлалтыт, садлан кечывалым пӧлемыште 20-23 градус леве лийшаш, йӱдым – 11-15 градус леве. Кушкыл одарланен кушшо манын, азотан ӱяҥдыш дене пайдаланем. Кок арнялан ик гана помидор росоташ «Фитофторин» растворым пульверизатор дене шыжыктем, – палдара Венера Викентьевна.
Эустома, астра, цинний…
Лум каен пытымеке, йӱдымат леве игече шогаш тӱҥалешат, озавате росотам кусарен шындаш теплицым ямдылаш тӱҥалеш. Туштыжо кок йыраҥеш помидорым шында гын, покшел йыраҥыш – кияр ден пурысым.
– Пеледыш-влак кокла гыч кызытеш эустома ден остеоспермум кушкыт. Эустомам январьыштак ӱденам, эше 4-5 лышташан гына лийын шуктен. Эустома роза гай коеш, аршаш семын пеледмыжым ончен куанет. Но ты кушкылым ончен кушташ куштылго огыл. Остеоспермум тӱрлӧ сынан висвис гай. Ынде икмыняр ий тудым шындем. Вашке астрам, циннийым, моло пеледыш нӧшмым ӱдаш жап.
Росотам ямдылымаште, пакчасаскам куштымаште нимогай секретем уке. Тӱҥжӧ – чылажымат йӧратен ыштыман. Эрдене кынеламат, иканаште окна дек каем, – манеш В.Григорьева.
Чынак, тудо чылажымат йӧратен ышта. Кеҥежым тӱрлӧ тӱс дене волгалтше пакчаже тидым пеҥгыдемда.
В.Григорьеван альбомжо гыч налме фото-влак.