Ава-шамыч тӱрлӧ улыт. Мӱшкырыштышт азам индеш тылзе нумал коштмеке, кылымдым пӱчкытат, ньогашт ош тӱням ужеш. Тыге тудлан илышым пуат. Но тӱрлӧ амаллан чот черле йоча шочеш гын, ава ден шочшо ойырлаш лийдыме гай улыт.
15 ешлан – полыш
Йоча южгунам ик ошкылымат ача-аваж деч посна ышташ лӱдеш. Тыгак моло нелылык денат начар тазалыкан йочам куштышо ача ден ава-влак вашлиялтыт. Адакшым чумыр гаяк нелылык ӱдырамаш-влакын вачӱмбакышт возеш. Теве Йошкар-Олаште Прохоров уремыште верланыше Столичный бизнес колледжыште начар тазалыкан ешласе ача-ава-влакын уш-акылыштым яндарешташ да капкылыштым тарваташ полшышо проект почеш пашам ыштат. Тудо «Любящий родитель» клуб» маналтеш. Тышке 15 ава шке икшывыж дене пырля ушнен.
Кажне шуматкечын тӱрлӧ ийготан йоча-влак дене жапым ты колледжын студентше-влак эртарат. Нуно посна пӧлемыште тӱрлӧ семын модыт, заданий-влакым шуктат.
Ты кок шагат жапыште ава-влаклан посна мероприятий эртаралтеш. Нуно фитнес-тренировкышто заниматлат, психолог дене тренингым эртат але тӱрлӧ вашлиймашыште шке нелылыкышт нерген каласкалат, йодыш-влаклан вашмутым муаш тыршат.
….
Колледжыште тунемше да МЧС да Правам аралыше органысе пашаеҥ-влак лияш ямдылалтше ӱдыр-рвезе-влак дене мутланышым. Нуно йоча-влак дене уло кумылын шке жапыштым пайдалын эртарат. Шукыж годым сӱретлат, пазлым погат, тӱрлӧ модыш дене модыктат. Тыгай паша кажныжлан оҥай. Тылеч посна тидыже илыш опытым пуа, ум пален налаш полша, куаным ешара.
…
