Марий кугыжаныш университетыште «Педагогический образований» направлений почеш «Шочмо (марий) йылме да литератур» профиль дене туныктышым ямдылаш тенийлан 18 бюджет вер палемдалтын. Тушто бакалавр программе дене ямдылаш тӱҥалыт.
Тидын нерген 27 июньышто Марий Эл Республикын кугыжаныш йылме шотышто правительственный комиссийын заседанийыштыже МарГУ-н Калыкле тӱвыра да тӱвыра кокласе коммуникаций институтын директоржо Родион Чузаев палдарен. Тунемшылан 18 вер манмым колмеке, «Молан тынар гына?» йодыш шочеш, йылме комиссийыште лийше-влакат институт вуйлатыше деч тидымак йодыч. «Ышташ лиеш утларакымат, — вашештыш Родион Иванович да, чаманен, ешарыш: тунемаш толшыжо гына уке». Тынаржат уке! Абитуриент-влак кок пачаш утларак йодын толшо лийыт гын, Марий кугыжаныш университетыште вес ий гычак шочмо йылме дене туныктышо-влакым ямдылыме квотым шукемден кертыт манын палемдышт. Чаманаш гына кодеш, ончыч кугу конкурсым эртен тунемаш пуреныт, марий филолог але туныктышо лияш тыршеныт, кызыт шагал верышкыжат абитуриентым муаш неле.
Филолог-влакым МарГУ-штак магистр программе дене тений 12 еҥым очно туныкташ тӱҥалыт. Тылеч посна филологий направлений дене 6 еҥлан заочно тунемаш пураш, этножурналист шинчымашым налаш йӧн пуалтеш.
Эше ик куандарыше увер: Марий кугыжаныш университетыште кандидатлык да докторлык диссертацийым аралыме шотышто диссертационный совет ышталтшаш. Тушто руш да Российысе калык йылме-влак дене аспирантур почылтшаш. Тугеже самырык шанчыеҥ-влаклан шке пашаштым шкенан республикыштак аралаш да шанчызе лӱмым налаш йӧн пуалтеш.
Йылме комиссийыште эше кок йодышым ончымо. Марий йылме корпусын пашаже да лектышыже, марий йылмым йӱкаҥдыме нерген МарНИИЯЛИ вуйлатыше Л.Григорьева ден институтын пашаеҥже А.Чемышев палдареныт. Чылажат шонымо семын лиеш, «йӱкаҥдыме» пашаш утларак еҥ ушна гын, марий «Алиса» тений декабрь мучаш марте «сайынак мутланаш» тӱҥал кертеш манын палемдат. Тиде пашаш кеч-кӧат шке надыржым пыштен кертеш. Тиде ссылке почеш https://vk.com/mari_voice пурыза да регистрацийым эртен, марий йылмым йӱкаҥдаш полшыза.
Заседанийыште кумшо йодыш дене Курыкмарий районын да Козьмодемьянск ола администрацийла гыч вуйлатыше-влак каласкаленыт. Нуно шке кундемыштышт калыклан тӱшка уверым шаркалыме годым, Марий Эл правительствын тидын шотышто 2010 ийыште лукмо положенийже дене келшышын, шочмо (курыкмарий) йылме кузе кучылталтме дене палдареныт. Чылажат икшырымын, рушлат, курыкмарлат увертарат, возат, школлаште шочмо йылме семын тунемыт манын палдарышт.
Э.Иманаев.