Россий мучко эртаралтше «Всей семьёй» проектыш ушнышо эше ик еш – Кужэҥер район Визымйыр ялыште илыше Петровмыт.
– Ме ты проектыш тӱҥалтыш гычак огыл ушненна, но поктен шуаш тыршена. Кызытеш куд заданийым ыштенна. Ме ешна дене жапым эре пырля эртараш тыршена. Проектлан кӧра лӱмын иктаж-мом ышташ пешыже логалын огыл. Йошкар-Олашке кинотеатрыш миен толаш йӧратена. Тунам мемнан деке олаште илыше кок акам ден шӱжаремат икшывышт-влак дене ушнат. Кастене йоча-шамыч ачашт дене пырля шахмат дене кумылын модыт. Ялыштына курык кугу, чапле, чӱчкыдын мунчалтена. Йоча-влак пӧртым эрыкташ полшат. Фотожым гына шуэн ыштена. Проектлан кӧра шкенан ялысе Чалай Васлий лӱмеш тоштерыш миен савырненна, тудым 2000 ийыште почмо, – каласкала Н.Петрова.
Валерий ден Наталия коктынат Визымйырыште шочын-кушкыныт. Латшым ияшышт годым келшаш тӱҥалыныт, 2007 ийыште ушненыт, ынде 17 ий пырля илат, кум йочам ончен куштат. Валера – предприниматель, Наталия шке ялысе библиотекыште пашам ышта.
– Йочана-влак Руш Шой школышто тунемыт. Илья кандашымше классыш коштеш. Тудо колым кучаш моткоч йӧрата. Кум ияшыж годымак ты сомыллан кумылаҥын, кочаже эре пеленже налын. Воктенысе Мороз ялысе плотинаш коштеш. Каныш кечылаште кочажым, ачажым иктаж-кушко наҥгаяш йодеш. Кол кучаш каяш манын, кум шагат эрденат кынелаш ок ӧркане. Икымше колжо крючок деч посна логалын. Шукшым лескыш кылден да ротаным кучен, вара чылаштлан ончыктен коштын.
София ӱдырна визымше классыште тунемеш, тудо алмаз дене тӱрлаш кумылан. Эн изина, Злата, йочасадыш коштеш, тудо сӱретлаш, кушташ йӧрата, – каласкала Наталья.
Еш ондак ача-аван суртышто илен, вара кок пачашан чапле пӧртым нӧлтеныт. 2019 ий годсек тушто илат. Сад-пакчам кучат. Озавате пеледышым йӧрата. Чывым ашнат, шке шыл лийже манын, кеҥежым сӧснаигым налыт.
Петровмыт йӱлам жаплен илат. Тидын нерген Наталия тыгерак каласкалыш:
– Уло ешна дене кажне ийын ялна воктенысе кӱсотыш Агавайрем кумалтышыш коштына. Йоча-шамыч шочмо калыкын йӱлажым палышаш улыт, тудо тукым гыч тукымыш куснышаш. Кугече пайремланат икшывына-влак мый денем пырля ондакак кынелыт, муным чиялтат, кугече когыльым ышташ полшат.
Тыгак ешна дене коча-кова дене погынаш йӧратена, поснак – Йошкар-Ола гыч ака-влакын да шӱжаремын толмекышт. Вет кугурак-влакымат жаплен илыман, мондыман огыл.
Петровмыт кок ий ончыч путешествоватлаш тӱҥалыныт. Тыге еш дене Москошто, Санкт-Петербургышто лийыныт.
Еш альбом гыч налме фото.
Проектын темлыме заданийым шуктымеке, тидым фото дене пеҥгыдемдыман да #всейсемьёй, а Марий Эл гыч еш-влаклан эше #всейсемьёй12 хештег дене соцкыллаште вераҥдыман.