Озаҥ олаште Калык-влакын келшымаш пӧртыштӧ «Йӱлам арале» молодёжный форум эртаралтын.
Тушко уло Татарстан гыч марий-влакын национально-культурный автономийыштын чолга еҥышт-влак ушненыт. Менделеевск, Кукмарий, Арск, Мамадыш, Балтаси, Актаныш, Мензелинск районла, Набережный Челна да Озаҥ олала гыч чылаже 14-35 ияш 40 ӱдыр-рвезе погынен.
Форумышто уна семын марий мурызо Павел Филиппов (Йорга Каче) лийын. Ӱдыр-рвезе-влак тудлан ятыр йодышым пуэденыт, шкеж нерген шуко пален налыныт.
Тыгак участник-влак команде дене уш-акылым пудыратыме модышышто модыныт. Туштыжо марий тӱвырам да марий йылмым аралыме шотышто йодыш-влакым тарватеныт. Пуымо йодыш-шамычлан ӱдыр-рвезе-влак шке темлымашыштым ойленыт.
Тиде погынымаш самырык-шамычым ылыжтен манын ӱшанен кодына.
Любовь Михайлова.
Авторын колтымо фото-влак.
