Тений шошым интернет кумдыкышто AY YOLA башкир группын «Homay» мурыжо кумдан шарлен, кызытат тудым ятыр еҥ колыштеш. Шукерте огыл ты мурым марла кольым. Пошкырт кундем Нефтекамск олаште илыше Мария Ираева марла мурымыжым видеош войзен да соцкылышкыже вераҥден. Марий ӱдыр дене лишкырак палыме лийына.
Марий улмыж дене кугешна
Мария – Пошкырт кундем Краснокам район гыч. Марий ешыште шочын-кушкын, ешыже Николо-Берёзовка селаште ила.
– Ушмен кыдалаш школышто тунеммем годым тӱрлӧ мероприятийыште муренам, вӱдышӧ лийынам. Музык школыш эстраде вокал пӧлкаш коштынам. Школ деч вара Уфа оласе сымыктыш колледжын студенткыже лийынам, «хоровое дирижирование» отделенийыште шинчымашым погенам. Вара Нефтекамск олаште шке студийым почынам, кумылан-влакым мураш, фортепианым шокташ туныктем, – каласкала М.Ираева.
Мариям Нефтекамскыште шукын палат. Тушто ӱдырлан келша гынат, Николо-Берёзовка села деч чонлан лишыл верже укеат, манеш. Мотор пӱртӱс лоҥгаште тудо вийым пога, мӧҥгыжӧ толын, лишыл еҥже-влак дене марла кутыралта. Ты селаште утларакшым руш-влак илат гынат, Мариямытын ешыштышт марий йӱла, тӱвыра нерген огыт мондо, аваж ден коваже ӱдырым калык йӱлам жаплаш да пагалаш туныктеныт. Садлан марий улмыж дене ӱдыр кугешна, шке вожшым ок мондо.
«Музык – илышем»
М.Ираева изинек мураш кумылан, 4-5 ияшак музыклан шӱмаҥын. Аваж гоч кокаже-шамычын ожнысо марий муро-влакым шуйдарымыштым изи ӱдыр шулен колыштын.
Кызыт М.Ираева шкеже сценыш шуэн лектеш, но ончыкыжым ты экшыкым тӧрлаш шонем, манеш. Усталык шӱлышан ӱдыр тыгак фортепианым да гитарым шокта.
– Музык мыланем – уло илышем, шке пашам куаным конда. А туныкташ 18 ияшак тӱҥалынам, студент годым Уфа олаште иканаште ныл вокальный студийыште пашам ыштенам. Утларакшым кугыеҥ-влак студийышкем толыт, йоча-шамыч денат кылым вашке муам, – манеш М.Ираева.
AY YOLA группын мурыжым марлаш кусараш шонымаш вучыдымын лектын. Икана эрдене пашаш каяш ямдылалтмыж годым аваже «Homay» мурым колтен, лач тыгодым ты мурым марлаҥдаш шонымаш шочын. Вара Мария студийышкыже миен да ты мурым ончыч руш йылмыш, вара марлаш кусарен.
– Камерым чӱктенам да мурымем войзенам, соцкылысе лаштыкышкем вераҥденам. Эрлашыжлан ты видеом 110 тӱжем наре еҥ ончен шуктен улмаш, – шарналта ӱдыр.
Яра жапше годым Мария тренировкыш, кушташ коштеш, йога дене заниматла. Йолташыже-шамыч дене вашлийын жапым эртара, студийжылан у проект-влакым ямдыла. Йӧн лийме семын шочмо селашкыже вашка, коча-коваже, ешыжлан полша. Усталык шӱлышан ӱдыр тӱня мучко путешествоватлаш, пиалан ешым чумыраш да музык тӱняште кугу кӱкшытыш шуаш шона. Тугеже, ончыко гына, Мария!
М.Ираеван альбомжо гыч налме фото.