15 апрельыште Йошкар-Оласе 9 кумдыкым тӧрлымӧ шотышто йӱклымаш тӱҥалын. Тудо 31 май марте шуйна.
Йӱклымаш «Жильё и городская среда» национальный проектын «Формирование комфортной городской среды» федеральный проектше почеш 12.gorodsreda.ru сайтыште эртаралтеш. Тыгак Госуслуги порталыште йӱклаш йӧн уло. А кӧ тидым ыштен ок мошто, волонтёр-влак полшат. Нуным «Планета», «Ананас», «Плаза», «Дом быта», «Форум», «Yolka» ужалыше рӱдерлаште кажне кечын 15 гыч 19 шагат марте муаш лиеш. Тыгак волонтёр-влак Ленин проспектысе 24 а пӧрт ден Эшкинин уремысе 8 номеран пӧрт адресла дене верланыше Шуко функциян рӱдерлаште (МФЦ) 15 гыч 19 шагат марте лийыт.
Йӱклаш Йошкар-Олаште илыше 14 ияш да тылеч кугурак еҥ-влакын правашт уло. А марий еҥ-влаклан Марий паркым сылнештарыме верч йӱкым пуаш темлена. Айста оланам эше сӧралракым ыштена! Тӱшкаште — вий!