Йӱклымаш шке радамже дене эртен

Марий Элысе Общественный палатын увертарымыж почеш, 1 июльышто, Конституцийыш вашталтышым пуртымо шотышто  йӱклымӧ кечын, республикысе сайлымаш участкылаште 2000 утла еҥ эскерыше семын пашам ыштен. Нунын коклаште 9 мер ушем гыч  еҥ-влак лийыныт. Йӱклымаш шке кӱкшытыштӧ эртен, чылажат законно лийын манын палемденыт эскерыше-влак. Тидын нерген теҥгече эртыше пресс-конференцийыште республикысе Общественный палатын вуйлатышыже Г.Дементьев да мер ушемын еҥже-влак пеҥгыдемден ойленыт.

Марий Эл Республикысе ЦИК-ын данныйже почеш, ончылгоч йӱклымӧ жапыште республикыштына 40,3% сайлыше (215 743 еҥ) йӱклен. Эн шукын Шернур (69,14%), Юрино (62,97%), Килемар (62,62% ) районласе участкылашке толыныт. Йошкар-Олаште 26,3% веле ты кечылаште йӱкшым пуэн.

Чылаже кундемыштына 61,86 % еҥ йӱклен. Волжский (84,16%), Параньга (83,53%), Юрино (81,7%%), Килемар (80,06%) район-влак ончылно лийыныт. Йошкар-Олаште 45,87% еҥ йӱклен.

Йӱклаш толшо гыч 75,76 % еҥже Конституцийыш вашталтшым пуртымо дене келшен, 23,43 % тидлан тореш улмыжым ончыктен.

И.Речкинын фотожо.