Юл кундем федерал округысо «ФормАRT» фестивальыште эн сай граффитим ойырымо шотышто йӱклымаш тÿҥалын. Тушко Марий Элыште илыше-влакат ушнен кертыт.
Кажне кумылан еҥ келшыше пашалан шке йӱкшым пуэн сеҥа. Тидлан 17 август марте 8(800)301-50-23 номеран телефон дене йыҥгыртен, 1 гыч 14 числа марте участникын номержым каласыман. Йыҥгыртымылан оксам тӱлыман огыл. Йӱклаш ик гана веле лиеш.
Йошкар-Ола гыч сӱретче Илья Беловын пашажымат йӱклымӧ радамыш пуртымо. Тудын «Проводник» граффитижым кокымшо номер дене вераҥдыме. Ушештарена, авторын ты пашажым Йошкар-Оласе 28-ше номеран лицейын пырдыжыштыже ужаш лиеш.
Фестивальын официальный сайтыштыже (formartpfo.ru) граффитин кузе шочмыжым ужаш йӧн уло. Тушто тыгак фото ден видеоматериал-влакым вераҥдыме.
Иктешлымашым фестивальым торжественно петырыме годым ыштат. Тудым 25 августышто Киров олаште эртарат. Кум сеҥышылан 100 гыч 200 тӱжем теҥге марте окса премийым кучыктат.
Тенийысе фестивальын темыже Туныктышын да наставникын идалыкыштлан пӧлеклалтын. Тудлан «Сила знания» лӱмым пуэныт.