Тыге тудлан чӱчкыдын ойлат. Пытартыш жапыште марий муро аланыште Кристина Краснован лӱмжӧ чӱчкыдынрак йоҥга. 2023 ийыште «Уна мурылан» войзымо клипшымат йӧратен ончена. Мотор, самырык, уста ӱдыр «Кугарня» газетын шукерте огыл эртарыме «Йӧратымашын уло юзо вий» концертыштыжат мурен ыле.
Эр гыч кас марте – тунеммаште
Кызыт Кристина И.Н.Ульянов лӱмеш Чуваш кугыжаныш университетыште кокымшо курсышто тунемеш.
– Илышем медицине дене кылдынем, врач лияш ямдылалтам. Авамат (мурызо Эльвира Краснова) ты аланыштак тыршен, фельдшер лийын, садлан медицине дене изинек «палыме улам», манаш лиеш.
Университетыш тунемаш пураш сайынак ямдылалташ кӱлын. Йошкар-Оласе 13-шо номеран школышто 9-ше классым тунем пытарымеке, Морко район Коркатово лицейыш куснышым. Вет тушто ӱдыр-рвезе-влакым биологий да химий профиль дене республикыштына ик эн сайын ямдылат, – ойла ӱдыр.
Студенткын «паша кечыже» 8 шагатлан тӱҥалеш. Университетыште мужырлаште ныл-вич шагат кас марте лийме дене ок серлаге, шке гычат тунемеш. Вара тӱшкагудыш миен пура, изиш каналта да адак учебникым кучен шинчеш, конспектым воза.
– Медфакультетын студенткыже лияш куштылго огыл. Чыла ыштен шуктыман, эре тунемман. Молан гын тиде профессийлан тунемаш пуренам манын, южгунам ӧкыненат шоналтем. Чот неле годым Ирина акам дек йыҥгыртем. Тудо туныктышо, Йошкар-Олаште ила. Лач акам мыйым кузе «верыш шындаш» сайын пала. Тудо эн лишыл еҥем, шӱлышем, эҥертышем. Йӧсӧ годым каласыме шомакше эм гай: лыпландара, да чыла шке верышкыже шинчеш, – манеш Кристина.
Муро – эм
Ӱдырын эше ик «эмжылан» усталыкым шотлыман. Лач тунемме дене гына эре илаш гын, шырпе пырче семын йӱлен пыташ лиеш, манеш Кристина. Садлан чон йодмо почеш шуктымо сомыл – мураш, кушташ.
– «Марий памаш» ансамбльыш жап лийме годым коштам, каникул годым тидым ышташ йӧнанрак. А мурем кеч-кунам: куан годымат, неле пагытыштат. Университетна пелен фолк-группым чумырымо, тушкат коштам, руш муро-влакым мурена. Тыге медицине дене кылдалтше илышышкына усталык шӱлышым пуртена.
Такшым муро илышыштем – изинек. Йочам годым авам дене пырля эре муренна, тунам мутшымат эше сайын каласен моштен омыл. Школышто кумшо классыште тунеммем годым военно-патриотический конкурсыш колтеныт, тушто «Главный праздник» мурым йоҥгалтаренам. Тылеч вара музыкым туныктышо мыйым эре конкурслаш коштыктен. Но тунам мыланем ала-молан кушташ утларак келшен.
Авамын усталык шӱлышыжӧ, мастарлыкше мыланемат кусненыт. «Йӱкет чылт аватын гай» манын шуко еҥ деч колынам, эн ончыч тидым родем-влак ойленыт. Кунам кызыт тыгай шомакым колам, шӱм-чонем йывырта, – ойла ӱдыр.
Кызыт концертлаште але иктаж мероприятийлаште Кристина аважын мурыжо-влакым мура. «Кунам иктаж-кӧ гармоньым шокта, але келшыше вес семым колам, тунам кӧргыштем пуйто ала-могай тул ылыжеш, тыгай годым мурылан чон гыч лекше шомакым серыме шуэш. Кӧ пала, ала ончыкыжым тидын марте кӱын шуам?» – палемда К.Краснова. Чыла семӱзгар кокла гыч гармонь утларак сымыстара. Южгунам шкежат тудым кучен шинчеш да семым келыштараш тырша.
К.Краснован альбомжо гыч налме фото-влак.