Ача-авам дене пырля илыме годым мӧҥгыштына ала-мо улмым эре шижынам. Но тудо шкеж нерген нигузе палдарен огыл: ны шкаф гыч нимо камвозын, ны омса шке петырнен, ны моло йӱк-йӱан шоктен огыл.
Икана йӱдым малымем годым ала-кӧ кидем чот пӱтырен кучен. Шкеже малем, но корштымым шижам, туге гынат нигузе помыжалт ом керт. Тыгай шижмаш ятыр еҥлан палыме, шонем: помыжалташ толашет, но нигузе тидым ыштен от керт. А кидемым виянрак да виянрак кормыжта. Кенета вес кидем дене тиде ала-мом руалтышым да кидем мучыштарен сеҥышым. Тунам пуйто ала-могай янлыкын йолжым кученам, айдемын кидше тыгай пунан огыл.
Пӧлемыштем садак мален ом керт манын, ача-авам дек пӧлемышкышт кайышым. Нуно тулым чӱктышт да мыйым тиде шучко омо гына манын лыпландараш тӱҥальыч. А мый нунылан чот кормыжталмылан кӧра йошкаргыше кидем ончыктем. «Кидет пызырен маленат, садлан йошкарген», – мане авам.
Тылеч вара пӧлемнам ача-авам дене вашталтенна. Но нуным йӱдым нигӧ да нимо тургыжландарен огыл, садлан мыланем ӱшанен огытыл.
Марлан лекмекыже, акам олаш илаш куснен. Лач тудын кайымекыже, мыйым йӱдым ала-кӧ лӱдыкташ тӱҥалын. Кызыт, ятыр ий эртымеке, ме тидын нерген мутым луктынна. Акам декат йӱдым ала-кӧ чӱчкыдын толеден улмаш. Тудо малаш вочмо деч ончыч молитвам лудын да оҥжым ыреслен – тыге эр марте сайын мален.
Мыят ынде ешан улам. Ача-авам дек мийымем годым ондакысе пӧлемыштем йӱдым эртараш ом тошт – вес пӧлемыште малем, оҥем ыреслен возам. Акамын ойлымыж почеш, мемнам суртводыж лӱдыктылын. Но тудыжо лӱдыктышаш мо? Суртым аралышаш вет.
Инна.
Йошкар-Ола.