5 сентябрьыште Республикысе изосымыктыш тоштерыште «Северные широты» ончер почылтын.
Йӱдвелын моторлыкшым ончыктышо ты проект почеш пашам эше 2009 ийыштак тӱҥалме. Тыгай шонымашым Тольятти гыч живописец Игорь Панов ден график Алексей Зуев илышыш шыҥдареныт.
Усталык шӱлышан еҥ-влак Карелийысе Онежское ден Ладожское ер-влак воктеке миен толыныт, Заполярьеште, Норвегийысе Лофотенский отрошто, лийыныт, Русский Север кундемыште, Белый теҥызысе Терский сер воктене картиным возеныт, Камчаткысе вулкан-влакым, Тихий океанысе серым, Сахалин отром ужыныт.
2020 ийыште «Северные широты» проектлан Тольяттисе кугыжаныш университет полыш кидым шуялтен. 2021 ийыште Камчаткыш миен толаш Руш географий обществын Самарысе пӧлкаже полшен. Тидыже художник-влакын кандашымше путешествийышт лийын. Тольяттисе студент-влак ты кок сӱретче дене пырля пелотрон тӱрлӧ вержым кок арня ончен коштыныт. Нуно Маячный ден Вертикальный мыс-влакым, Вилючинский ден Мутновский вулкан-шамычым ужыныт, Плоский Толбачик вулканын курык йымалныже Мёртвый чодыран, Студёный эҥер серыште Тихий океанысе Вилючинский бухтын сӧраллыкшым акленыт. Нине верлашке логалаш пел кече кӱлын, а сылне пӱртӱсым ончыкташ – кок-кум шагат. Варажым мӧҥгышкӧ кужу жап толыныт. Тыгодым сӱретче-шамычлан Йӱдвелысе эксремальный условийыште пашам ышташ логалын. Кажне путешествий гыч Игорь Панов ден Алексей Зуев пырляже 30-40 картине дене пӧртылыныт.
Ончерыште автор-влак дене пырля лияш, талантыштым да мастарлыкыштым аклаш, нунын да Йӱдвел мландысе шӱлышым шижаш лиеш. Кажне сӱретчын – ойыртемалтше стильже, палыме койышыжо, а мастар-влакын пырля чумырымо ончер когыньыштынат сымыктышышт верч йывырташ да ойыртемалтше тӱсыштым ужаш, икте-весышт дене таҥастараш йӧным пуа.
