манеш М.Шкетан лӱмеш Марий драмтеатрын актёржо Алексей Тетерин.
Театрыште 2005 ий годсек тыршыше Алексей Тетерин тымарте 26 рольым модын. Пытартыш жапыште тудым икмыняр тӱҥ рольышто ужна. Режиссёр С.Пектеев «Гамлет. Машина. Цемент» (У.Шекспир) спектакльыште актёрлан Гамлетын образшым ӱшаныш. Варажым Алексей «Шӱдыран тат» комедийыште Колюшын образшым келыштарыш.
А.Тетерин мутланымына годым режиссёр-влакын ойлымо «Чылажат тӱҥ роль, изи роль уке» ойым икмыняр гана ушештарыш. Тыгай шонымаш дене ончыко каяш куштылгырак. Актёр тугакшат эре тунемаш да шинчымашым пойдараш ямде, сайлан ӱшанен, тӱрлӧ сынан да шкешотан пашалан пижеш.
…
– Актёрат шинчымаш дене пойдаралтшаш. Тыгай сомылым тый кузе шуктет?
– Книгам лудам. Школышто тидлан шукырак жапым ойыренам. Тунемаш пешыжак йӧратен омыл, но лудынам. Шарнем, ялысе библиотекыште куд-шым книгам кок арнялан пуат ыле. Мый налам да нуным арняште лудынат пытаренам. Сдатленам да адак налынам. Ик жап, телым мӧҥгӧ кошташ огыл манын, Пектубаево селаште чӱчӱмыт дене иленам. Чӱчӱньӧ мый дечем книга-влакым шылтеден – кочмо годым книгам лудмо келшен огыл.
Кызытат кочкаш шинчам гын, телефонышто книгам почам. Шукерте огыл Михаил Зощенкон произведенийлажым, Стивен Кингын ойлымашыже-влакым угыч лудынам, кызыт – фантастический романым. Южо еҥ «Мастер и Маргарита» романым ом умыло манеш, тудым мый школышто тунеммем годымак вич гана лудынам. Мемнан библиотекына пеш поян лийын. «Властелин колец» роман-эпопейын чыла книгажым 9-10-шо класслаште куанен лудынам.
…
Умбакыже — 24 февральысе «Кугарня» газетыште.