ПОЛШЫЗА!
Чыла лудшына, калык деке эше ик гана ӱжмаш дене лектына: айста Ярославлан эмлалташ ситыше 13 миллион теҥгежымат писын погаш полшена. Кертмыда семын оксам фотошто ончыкталтше счетыш колтыза. Предприятий, фирме вуйлатыше-влакат ты поро пашаш ушныза. Чылалан тау.
Тудлан кызыт индеш ий. Тышеч кокытшым Йошкар-Ола гыч Ярослав Яковлев эмлымверыште эртарен: ныл пырдыж, капельнице, кормыж дене эм… Уло тудын тыгак куаным ылыжтыше чевер чия дене сӧрастарыме модыш пӧлемже да кумда тӱняшке ончаш эмлымвер пӧлемысе кугу окна. А эше воктеныже улыт поро кумылан да кажне гана черым сеҥаш шонен, палатыш ӱшан дене пурышо врач, медсестра-влак. Эн ӱшанле шокшыжым Ярослав шинчавӱдеш йомшо шинчаончалтышан, кажне гана икшывыжын малымыж годым шӱлымыжым колышташ тыршыше, шуко омыдымо йӱдым чытыше аваж деч шижеш.
Чыла тиде илыш сӱретлан Ярослав ынде тунемын, очыни. Можыч, тыгак лийшаш манынат шона? Такше изи еҥын уш дене умылаш неле: молан тудо эре эмлымверыште, а изаже мӧҥгыштӧ илен, школышто тунем кертеш… Йоча-влак уремыште модын куржтал кертыт, а тудлан ок лий. Ух, шонкалет гын, мо гына ушыш ок тол.
Да, ойгым пален, кугыеҥлан чыташ неле. А кунам шке йоча азапыш логалеш, тунам ача-аван вуйжо, шӱмжӧ, чонжо мом чытышаш?
Но ойго ойго дене, нелылык уло гын, тудым сеҥыман, черым эмлыман. Тыгай шонымаш денак илаш тырша кызыт Йошкар-Ола гыч Яковлевмыт еш. Ача-ава йӱдшӧ-кечыже манме гай эргыштым чер деч эмлаш йӧным кычалеш. Нунылан родо-тукымышт, волонтер-влак полшат. Поро кумылым ончыктышо фонд икмыняр миллион теҥге дене оксам ойыреныт. Чылажат илаш тӱҥалше йочан тазалыкшым пӧртылташ ышталтеш. Но окса полыш садакат кӱлеш: 26 миллион теҥге гыч пеле утлажым погымо. Кызыт Ярослав аваж дене Израильыште улыт, эмлалтыт.
Ярославын ешыже кажнылан пеш кугу таум ойла.
‒ 26 миллион теҥге кӱлеш манмекышт, лӱдыкшӧ ыле. Но ава семын шке шочшым утараш мый чылажымат ыштышаш улам. Сандене чот неле ыле гынат, поро кумылан еҥ-влак деч полшаш йодын, оксам погаш тӱҥална. Тау Юмылан, тыгай еҥже тӱняште шукын улыт улмаш. 13 миллионат шагал огыл, но тиде чумыр окса гыч ‒ пелыже. Ярославын пиалже, тазалыкше верч кугу ошкыл ышталтын. Тау чыла поро кумылан еҥ-влаклан. Тек нунын илышыштышт чылажат сай лиеш. Тыгай ойгым нигӧ ынже пале манын тыланыме шуэш, — ойла Ярославын аваже.
Кӱчыкын еш дене палдараш гын, Ярославын ачаже ‒ Олег Александрович ‒ Морко район гыч, кызыт йӱдвел кундемыш пашаш кудалыштеш. Йошкар-Олаште Поволжский кугыжаныш технологический университетым программистлан тунем пытарыме деч вара ик жап «Марий Эл» газет редакцийыште компьютер технике дене специалистлан, республикыште нефтьым перерабатыватлыше заводышто ыштен. Людмила пелашыже Марий Турек районын шочшыжо, Марий кугыжаныш университетыште тунем лекмеке, ты вузысо лудмыверыште пашам ыштен, кызыт ‒ эре йоча пелен.
Ярослав такше илышлан куаныше айдеме. Изинек шахматлан шӱмаҥын, пырыс дене модын, кумылжым нӧлтен. Но кызыт чыла тиддеч деч посна илаш логалеш. Ӱшан дене илаш. Эрласе кече сайрак лиеш, а икмыняр жап гыч шучко чер йоча кап-кыл деч кораҥеш да шучко омо семын мондалтеш манын шонен…
Э.Иманаев.