Лач тыге лӱмден Российын сулло, Марий Эл Республикын калык сӱретчыже И.В.Ефимов шкенжын черетан ончержым. Тудо таче, 12 сентябрьыште, Республикысе изосымыктыш тоштерыште почылтеш.
Тушто художникын этнофутуризм направлений дене шуктымо радынаже-влакым ончыктымо. Уста еҥ мастарлыкшым графикыште, живописьыште, монументальный сымыктышыште, станковый манме искусствышто (интерьерысе живопись) шуарен.
Этнофутуризм дене кылдалтше икмыняр радынаже йотэлласе ончерлаште ончыкталтын ыле. Тушто нуным куанен вашлийыныт.
Курыкмарий ялын шочшыжо Измаил Варсонофьевич республикыштына тыгак тӱҥ герольдмейстер сомылым шуктен. Тудын полшымыж денак Марий Эл Республикын гербше, штандартше, республикым вуйлатышын знакше (палыже), икмыняр районысо герб ден флаг ышталтыныт. Эсогыл шкенжынат геральдический палыже уло.
Пытартыш коло вич ийыште И.В.Ефимов этнофутуризм направлений дене пашам ышта. Этнофутуризм – тиде историйым, чон поянлыкым да ончыкылыкым авангардный йӧн дене ончыктымаш. Тышке тӱвырасе ваштарешла шогышо кок шонымаш ушалтын: ик могырым – акретле, вес могырым – тӱнямбалысе да у. Тидыже сымыктышыште шке мастарлыкым кучылташ кугу йӧным пуа.
– Тыге, – ойла тудо, – чыла шонымашым, кӧргӧ шижмашым, ятыр илыш картиным ончыкташ лиеш. Нуным ме умылен гына моштышаш улына. Ты направлений дене пашам ыштыше пеш шагал. Южо материалым тыге веле калыклан палдараш келшен толеш.
Мый шке пашам-влак гоч еҥ-шамычлан тӱням ончыктынем. Радына гоч еҥ-влак илышын тӱрлӧ шӧрынжым ужышт, шонем. Тыгак тошто этнический материал негызеш ум шочыкташ да нуным илышыште кӱлеш семын кучылт мошташ таратынем, – ойла Измаил Ефимов.
Тӱрлӧ чиян сӧрал картиныже-влак дене сӱретче марий калыкын тӱняумылымашыжым да шкешамжым кумдаҥдынеже. Тыгодым тудо пеш ожнысо символике ден формо-влакым кучылтеш, тӱрлӧ образым шочыкта. Марий орнаментын элементше-влак полшымо дене живопись поянлыкнам аклаш кумылаҥдат.
Измаил Ефимовын ойырен налме художественный йӧнжым «орнаментальный», «декоративно-узорчатый» але «просто абстрактный» маныт. Тидыже мемнам калык-влакын шкешотан тӱняумылымашышкышт, мифологийышкышт да чий йӱлашкышт наҥгая.