Ресторан ден кевыт-влак, фитнес-центр ден спортзал, парикмахерский, каныме рӱдер-влак тиде кечылаште пашам огыт ыште. Изирак бизнес маныт гынат, Российысе экономикылан ыштыме пайдаже кугу. Элна мучко куд миллион тыгай компаний шотлалтеш, тушто 22 миллион наре еҥ пашам ышта.
Бизнесыште пашам ыштыше-влаклан правительстве тыгайрак полышым пуаш ямде:
– НДС деч моло налоглан куд тылзаш отсрочко;
– кредитный договорым куд тылзылаш «шӱкалаш» лиеш;
– кредитым налше бизнесъеҥ кумшо ужашыжым гына тӱла. Ик ужашым банк пӧртылта, а вес ужашым – кугыжаныш.
Марий Элыште изирак бизнесыште тыршыше еҥ-влак тиде неле пагытым кузе илен лекташ шонат?
Татьяна Козлова, Оршанке район:
Йошкар-Олаште корей косметикым ужалыше кевытем уло. Верым айлымылан оксам шуко тӱлыман, а кызыт кевыт парышым конден огеш керт. Сандене тудым петыраш шонымаш уло. Пытартыш жапыште сатум интернет йӧн дене ужалем да умбакыжат тыгак ужалаш шонем.
Сергей Карпов, Йошкар-Ола:
«Мари-Рекордс» ООО фирмем уло. Налогым да пенсионный отчислений-влакым тӱлаш жап шуын, йӧра шапаш оксам лийын. Кызыт мӧҥгыштӧ улам. Койдымо пашам ятыр погынен: видеоролик-влакым ыштем, компьютер дене текст-влакым печатлем, книгам лудам. Умбакыже мо лиеш, илена – ужына.