Паша айдемым илаш туныкта, чапым конда. Пашам ыштыде, илыш корнышто пеҥгыдын шогаш, неле-йӧсым сеҥен лекташ от тунем. Параньга район Олор ялыште шочын-кушшо, кызыт Звенигово олаште илыше Галина Иосифовна Гланова (ӱдыр фамилийже Очеева) 17 ияшак фермыште дояркылан ышташ тӱҥалын. Сай пашажлан тудым тӱрлӧ медаль да чапкагаз дене палемденыт.
Барнаул марте шуын
Фермыште ыштыме жапше Галина Иосифовнан илышыштыже поснак лакемалт кодын. Тунам илышыжат пуйто шолын, колхоз пашат ушнен толын, ял тӱзланен. Кызыт шаланыше колхозым ончен, южгунамже шинчавӱдшат лектеш. Вет изинекак тудо колхоз пашашке чолган ушнен. А кажне шыже еда класс дене пырля колхоз пасушко пареҥгым, ушменым погаш коштын. Икшывын ыштен налме окса ешлан роскотым петыраш кугу шӱкалтышым ыштен.
– Мый ныл шочшан ешыште шочын-кушкынам, кумшо йоча лийынам. Кызыт кок акам Олор ялыште илат, шольым – Марий Турек посёлкышто. Ачам 44 ияшак ӱмыр лугыч лийын, авам ныл шочшым шкетынак йол ӱмбак шогалтен, мемнам илыш корнышко луктын. Тудо ӱмыржӧ мучко колхоз фермыште дояркылан ыштен, кок акамат тушко коштын. Ешым пукшыман, чиктыман, сурт-оралтым нӧлтыман, уэмдыман ыле. Сандене окса эре кӱлын.
Авайлан полшаш манын, 14 ияшак канышыште колхоз фермыште дояркылан ышташ тӱҥальым. Ты пашам сайын паленам, ушкалым изинек лӱштен моштенам. Кеҥеж гоч фермыште пашам сайын ыштымемлан 9-ше классыште ушкалым лӱштымӧ ик конкурсыш колтышт. Районышто, республикыште икымше верым налынам. Варажым Марий Эл гыч шкетын Алтай кундемыш Барнаул оласе ик слётыш миен коштынам да тушто Юл кундем федеральный округ гыч ончыл верым сеҥен налынам. Пӧлек шотеш мыланем фотоаппаратым пуэныт. Тудо жапыште тиде моткоч кугу пӧлеклан шотлалтын. Слётыш тӱрлӧ калыкын шочшышт погыненыт ыле. Нунын дене палыме лийынам, ятыр йолташым муынам, – ойла Галина Гланова.
Самырык ӱдырын сеҥымашыже кундемнам чапландарен, шочмо школышто кугу пагалымашым сулен. Эн тӱҥжӧ – тудын пашаже молылан сай пример лийын. Ты сеҥымаш самырык ӱдырлан эше чот пашам ышташ кумылым луктын.
Индеш ий фермыште
1977 ийыште, лу классым тунем пытарымеке, Галина Иосифовна фермышке пашам ышташ кодын. Неле, чытышан паша 17 ияш ӱдырым нимынярат лӱдыктен, чактарен огыл. Кожмак койышыжлан кӧра тудо чӱчкыдын сай лектышыш шуын.
– Тунам колхоз направлений дене Зина акамым Ежовысо совхоз-техникумыш тунемаш колтышт. Тудын олмеш мый фермыште тыршаш тӱҥальым. Эрдене кум шагатат пелылан фермыш лектын каем ыле. Бригадыштына 11 доярке тыршенна. Ме ончыч 18, варажым 25, 50 ушкалым аппарат дене лӱштенна, пукшенна. Тылзеш эн шукыжо 4000 литрым лӱштем ыле. Кечеш кум гана фермыш коштынна.
Паша неле лийын. Шкеак кугу корзиҥга дене силосым, фуражым, ушменым, олмымым, шудым нумалына ыле. Кечывалым олыкыш лӱшташ коштынна. Чыла ыштен шуктымо. Паша деч вара клубыш каяшат жапым муынна. Агитбригаде дене концертым ончыктенна, – манеш Г.Гланова.
Галина Иосифовна индеш ий фермыште тыршен. Шке пашажым писын шуктен. Шуко шӧрым лӱштымыжлан колхоз тудлан ик гана веле огыл чапкагазым, шергакан пӧлекым кучыктен. Комсомольский путёвко дене Венгрийыш, Чехословакийыш миен коштын. Ик жап шочмо верыштыже депутат лийын.
Умбакыже 21 октябрьыште лекше у номерыште лудса.