Марий кундемнан чыла вершӧрыштыжӧ кеҥеж гоч «Иле, мыйын ялем!» фестиваль эртаралтеш. Морко районыштат ик ял шотан илем администраций весылан эстафетым пуа.
Июнь тӱҥалтыште Кораксола ялыште колызо-влаклан таҥасымашым эртаренна гын, 23 июньышто изи Ярансола ялышке миен шуна. Ты ял моткоч сӧрал верыште шинча. Воктеныжак Яранке эҥер йоген эрта. Ял йыр саскалан поян чодыра гӱжлен шога. Тораштак огыл Васлигорем шинчалан перна. А Османгоремыштыже ожнысекак калык шудым солен илен. А калыкше тушто могае поро!
Ме, Кораксола тӱвыра пӧртын пашаеҥже-влак, Ярансолашке йоча-влаклан «Вуйчиемын юзо вийже» таҥасымашым эртараш миен веле шуктышна, уло калык иктышке чумыргыш. Кажныже могай-гынат пайрем чесым конден. Ӱстембалне мелна теркеже икте веле огыл шинчен. А моло сийжым каласенат от пытаре.
Мероприятийыш 12 икшыве чумырген. Таҥасымаш-влак вуйчием дене кылдалтыныт: «Шке вуйчиеметым сӱретле», «Шке вуйчиеметым ойырен нал», «Вуйчием да куп» да тулеч моло. Ӱчашымаш коклаштак Кораксола тӱвыра пӧрт пеленысе «Муро кумыл» фольклор ансамбль верысе калыкым шке мурйолваж дене куандарен. А Ярансола ялын тале гармоньчыжо Вениамин Борисов тыге чаплын шокталтен, икшыве-влак марла кушталтыде чытен огытыл. Нине чукай-влак рушла кутыраш толашат, но вӱрышт дене садыгак марий улыт, марлат чот тавалтышт.
Ты кечын мыланна, Морко ола шотан илем администрацийлан, Кораксола тӱвыра пӧртлан «Иле, мыйын ялем!» республикысе марафон-фестивальын эстафетыжым Шеҥше ял шотан илем администраций вуйлатыше П.С.Иванова ден Шеҥше тӱвыра пӧрт вуйлатыше Р.М.Николаева кучыктеныт гын, ынде ме Кульбаш тӱвыра пӧртлан кучыктена.
Тек тиде марафон-фестиваль чумыр Марий кундем авалтен шукта, да марий шӱлыш кажнынан чонышто илаш тӱҥалеш!
Елена Григорьева, Кораксола тӱвыра пӧрт вуйлатыше.
Снимкыште: Ярансола ялыште эртаралтше «Вуйчиемын юзо вийже» таҥасымаш годым.
