Изи Тавран моторжо
Вес кундемыште илыше марий ӱдыр-рвезе-влак дене ужын кутыраш, нунын илышышт нерген пален налаш эре оҥай. Дарья Михайлова – Свердловск область Арти район Изи Тавра села гыч. Тений ӱдыр Марий икымше гана Элыш толын, Марий самырык тукым слётын участникше лийын.
Дарья Изи Тавра селасе школышто индеш классым тунем пытарен. Кызыт – Красноуфимскысе медколледжын студентше.
– Икымше курсышто тунемам, фельдшер лияш ямдылалтам. Ача-авам медицине аланыште пашам огыт ыште. Кокам – пӱйым эмлыше врач, тукым акам поликлиникыште медшӱжарлан тырша. Нунын деч медицине нерген шуко пален налынам, садлан шкемынат ты аланыште тыршаш кумылем лектын. Кызыт утларакшым 10-11-ше классласе программым тунемына. Физике, математике, биологий предмет-влак утларак келшат. Туныктышо-влак сай улыт. Пырля тунемме ӱдыр-рвезе-влак дене йолташ лийын шуктенна, – каласкала Д.Михайлова.
Изи Тавра селаште утларакшым марий-шамыч илат. Нуно пайремым пырля эртарат, ваш-ваш уна лийыт. Верысе клубыш изижат-кугужат коштыт, калык куштымашым шындат, марий муро-влакым мурат. Номерышт дене пошкудо яллашкат концерт дене лектын коштыт.
– Йолташем-влак денат марла вожылде кутырена. Шочмо йылмына, марий улмына дене кугешнена. Тений Изи Тавра гыч нылытын Марий Элыш Марий самырык тукым слётыш толынна. Школ директорна Любовь Анатольевна Иванова тушко ушнаш темлен. Тудо шкежат Марий Элыште чӱчкыдын лиеда. Йодмашым колтенна, эссем возенна. Лу шагат поезд дене, вара кок шагат автобус дене кудалмеке, Йошкар-Олаш толын шуынна.
Ола мучко йолын коштынна, мотор верлам ончен савырненна. Йошкар-Ола пеш мотор. Кужэҥер кундем шке сӧраллыкше дене чоным куандарен. Ты район нерген экскурсий годым шуко оҥайым каласкалышт. Посёлкысо тоштерыште ятыр экспонатым ужынна, – ойла Дарья. – Слёт годым занятийлаште кугу пайдам налынам, шкем гаяк марий ӱдыр-рвезе-шамыч дене палыме лийынам. Нунын дене кызытат кылым кучем. Ончыкыжымат ваш огына мондо манын ӱшанем.
Д.Михайлова спортлан шӱман. Волейбол, баскетбол дене модаш утларак йӧрата. Кызыт тудо уло жапшым тунеммылан ойыра. Ӱдыр ончыкыжымат Марий Элыш ик гана веле огыл толын каяш шона.
Д.Михайлован альбомжо гыч налме фото.