Йочасадыш коштшо икшыве-влак иктыгодде сӱретлаш йӧратат. Шукыж годым йӧратыме модышым, илыме верым, лывым, янлык-влакым лаштыкыште ончыктат. Тидын дене ача-аваштым, коча-коваштым куандараш тыршат.
Йошкар-Оласе 80-ше номеран «Ӱжара» йочасадыш коштшо куд ияш Настя Поликарпова тений школыш кая. Ӱдыр моткоч чаткан да сылнын сӱретла. Южгунамже изи кидше дене ош кагазым туге сылнын сӧрастара, ӧрат веле. Настя олаште ила гынат, марла чаткан да раш кутыра. Кеҥеж канышым Кужэҥер район Йывансолаште коча-коваже дене эртара. Ӱдыр марий поэзий деке шӱман кушкеш, почеламутым сылнын лудеш. Тӱрлӧ конкурсышто вийжым терга. Тиште кечылан пӧлеклалтше «Сылнымут аршаш» конкурсышто 1 верым налын. Республикысе «Колумб лудмаш – 2022» конкурсыштат икымше вер дене палемдалтын.
Настя чыла вереат чолгалыкшым ончыкта: мура, кушта, сӱретла, почеламутым лудеш. Тидлан аваже ден кресаваже кумылаҥдат. Ӱдыр поро кумылан, мутым колыштшо, тыршыше кушкеш. Йочасадыште моло йоча-влаклан сай примерым ончыкта. Школыштат чолгалыкше дене ойыртемалташ тӱҥалеш манын, ӱшаныме шуэш!