Эртыше кечылаште «Икымше» канал дене «Время своих» программым ончышда? Тушто Марий Эл гыч йыгыр изак-шоляк Денис ден Дмитрий Максимовмыт специальный военный операцийыште лиймышт нерген каласкаленыт.
Изинек чулым кушкыныт
Дима ден Денис Максимовмыт Морко район Кӱчыкэҥер ял гыч улыт. Дима шӱргӧ тӱсшӧ, йылме чолгалыкше дене чылт аваж гай, мыскарам ышташ пеш тале, Денис – тӱжвал тӱсшӧ дене ачаж гай, лыжгарак.
Чулым эрге-влак Эҥерсола тӱҥ школышто шинчымашым погеныт, чыла мероприятийыш кумылын ушненыт, мураш да кушташ мастар лийыныт. Кугурак лиймышт годым видеоролик-влакым войзаш йӧратеныт.
Школ деч вара изак-шоляк Йошкар-Оласе колледжыште парикмахер профессийым налыныт. Варажым Ульяновск олаште армий радамыште служитленыт, контрактым подписатленыт.
Канышлан, отпуск жаплан шочмо кундемышкышт толын каеныт. Дима ден Денис изинек пашаче лийыныт, сандене кертмышт семын ача-аваштлан пашам вораҥдараш полшеныт.
Икымше кече гычак…
Изак-шоляк, СВО тӱҥалмеке, икымше кечылаштак Шочмо элна верч шогышо салтак-влак радамыш ушненыт. Тунам «Гостомельский десант» нерген шуко увер шоктен. Десантник-влак Гостомель оласе аэродромым налме годым талын кредалыныт.
Икымше кредалмаш, сусыргымо, йолташым йомдарыме… А рвезе салтак-влаклан чыла тиде нелылык гоч илен лекташ кӱлын.
Снайпер лийыныт
2022 ий майыште 21-ше ВДВ бригадылан Попасная ола воктен тушманын стратегический рубежшым налаш кӱштеныт. Нунын коклаште Максимовмыт лийыныт, снайперын сомылжым шуктеныт.
50 еҥан тӱшка икмыняр шагат ошкылын да вучыдымын тушманын тылышкыже миен лектын. Сарзе-влак вӱдым да боеприпасым кондымо корнышто кӱлешан пунктым айленыт, но кенета ваштарешышт тушманын УАЗикше кудал лектын. Кредалмаш тарванен.
– Тушманын рацийже кидышкына логалмек, пален налынна: нуно 1800 еҥ лийыныт, ме – улыжат 50 еҥ. Нунын ваштареш мыняр салтак улмым пален огытыл, сандене могай-гынат пунчалым лукташ лӱдыныт, – шарналта «Танцор» позывноян Дмитрий.
Тушман-влак икмыняр кече мо лиймым умылен кертын огытыл.
– Ме вӱд да кочкыш деч посна куд кече шинченна. Вара лӱйкален пытарыме УАЗикым тергенна да икмыняр кленча вӱдым муынна. Чылалан ситен огыл, сандене командирна окружений гыч лекташ кӱштен, – изажын каласкалымашкыже ушна «Гюрза» позывноян Денис.
Мемнан салтак-влак окружений гыч лӱйкалыме йӱк почеш лекмышт годым, «Юмо, серлаге» манын кычкыреныт. Тидлан нуным аваже туныктен. Тудо эрге-влаклан осал мутым кучылташ огыл, неле жапыште юмо деч утараш полшаш йодаш темлен. Тыге рвезе-влак илыше кодыныт, шке задачыштым шуктеныт.
Подвигыштлан землякна-влак Патырлык орден дене палемдалтыныт. «Защитники Отечества» фондын марий филиалжын командыже социальный полыш шотышто герой-влаклан консультацийым эртарен, а сарзе-влакын аваштлан санаторийыште канаш йӧным ыштен.
Максимовмыт мыланна герой улыт! Ме нунын дене кугешнена.