Кеҥеж – сылне жап. Шокшо игече годым шукын вӱд воктеке вашкат: канат я йӱштылыт. Тыгай верыште лияш йӧратеда мо? Кӧ тендам ияш туныктен?
Жанна Фёдорова, радиовӱдышӧ:
– Шокшо пагытыште вӱд воктене канаш эреак сай. Мыят эҥер але ер серыште лияш йӧратем. Вӱд воктене мардеж пуалеш да южшат левырак. Шукыж годым лач сер воктене веле шинчем, молан манаш гын ийын ом мошто. Йоча годым эше йолташ-влак дене пырля йӱштылашат тыршенам. Йолташемат икмыняр гана ияш туныктен, но мыйын садак ок лек. Туге гынат, вӱдыш пураш, «йолым чывылташ» келша.