5-6 августышто Нижний Новгород оласе «Швейцария» паркыште палыме шеф-повар, ресторатор, телевӱдышӧ Константин Ивлевын «Да, шеф!» гастрофестивальже лийын. Тушко элнан тӱрлӧ кундемже гыч 133 тӱжем еҥ погынен. Нунын коклаште марий рвезе Никита Пчёлкин лийын. Тушко логалмыж нерген рвезе тыгерак палдарыш:
– Мый изи годсек кочкаш шолташ йӧратем. Куд ияш улмем годым икымше гана муным жаритленам. Кугурак лийме семын кочкышым ямдылыме рецептем-влак шукырак погыненыт. Тачат мый кочкаш ямдылаш йӧратем, тидлан ойыртемалтше рецепт-влакым эреак кычалам. Эртыше фестивальыш моткоч оҥайын логалынам. «Пятница» телеканалыште «Адская кухня», «Адский шеф» телепрограмме-влакым шукертсек ончем. Тушто ты аланыште ятыр ий пашам ыштыше да тӱҥалше повар-влак ӱчашат. Нижний Новгородышто гастрофестиваль эртаралтме нерген уверым ужынам, К.Ивлев лийшашым пален налынам.
Кочкаш ямдылымым, повар-шамычын тӱҥ приз верч ӱчашымыштым шке шинча дене ужаш манын, келшыме ӱдырем дене тушко каяш кумылаҥынна. Кок кече жапыште тӱрлӧ площадкыште мо ышталтмым эскеренна. Мутлан, икымше кечын костюмированный парад, тÿрлö ÿчашымаш да кочкышым тамлымаш лийыныт. Кокымшо кечын рекордым ончыктеныт: 276 литр лимонадым ямдыленыт. «Адский шеф» программын икымше йыжыҥыштыже сеҥыше Вячеслав Вьюнкинын вуйлатыме эстафетыжым поснак палемдынем. Тушто кажне кумылан еҥ команде дене пырля кочкаш ышташ полшен кертын. Ик минутышто пареҥге мелнам да «пашот» семын шолтымо муным ямдылен шуктыман ыле. Даша таҥем дене меат ты эстафетыш ушненна. Кÿчык жапыште шуко ум пален налынна. А шижмашнаже могай лийын!
Элнан ик эн тале да лӱмлӧ шеф-поварже дене пырля да ятыр еҥ ончылно кочкаш ямдылаш моткочак тургыжланымашан. Ивлев воктене чон моткоч вургыжын. Но мыланна чылажат келшен. Пӧлек шотеш мыланна фирменный фартукым да банданым пуэныт.
Могай молодец улыт мемнан марий ӱдыр-рвезе-влак!