М.Шкетан лӱмеш Марий театрын актёржо, Россий Федерацийын сулло, Марий Элын калык артистше тений 2 июльышто 60 ийым темыш. Лӱмгечыжым ончышо-влак дене пырля палемдаш «Йыван Кырла. Путёвка в жизнь» спектакльым ойырен налын.
Молан лач тиде спектакльым? Марий калыкын тӱнямбалне чапланыше киноартистше,
поэт Йыван Кырлан образшым И.Смирнов кок спектакльыште чоҥен.
Икымшыже «Ой, луй модеш» лийын, весыже – кызыт репертуарыште улшо паша. Икымшыжым чапланыше марий режиссёр Василий Пектеев, кокымшыжым
тудын эргыже, самырык да ум кычалше режиссёр Степан Пектеев шынденыт.
– Тиде кугу лӱман еҥын рольжым сценыште модаш – пеш кугу ответственность, – манеш
актер. – Йыван Кырла нерген утларак келгын пален налаш манын, шуко лудаш, еҥ-влак дене мутланаш логалын. Ты паша тунар чот шупшылын, мый героемым воктенемак шижаш тӱҥалынам ыле. Тиде рольым модмо годым кажне гана сценыш чон вургыжын лектам.
Икманаш, 9 октябрьыште Иван Смирнов ончышым «Йыван Кырла. Путёвка в жизнь»
спектакльым ончаш пагален ӱжеш. Тиде кастене айста йӧратыме артистна дене пырля лийына.
С.БЕЛКОВА.