«Шочмем деч ончычак – сценыште», –

ойла Йошкар-Оласе Г. Константинов лӱмеш академический руш драмтеатрыште режиссёр-постановщиклан пашам ыштыше И. Немцев.

Иван Немцев шукерте огыл ик мероприятий годым лишкырак палыме лияш йӧн лекте. Шке пашажым йӧратыше, мастар, илыш йогыным «кучен» моштышо, моткоч шкешотан да оҥай айдеме – Иван Иванович. Таче газетыштына уста актёр да режиссёр лудшо-влаклан шкеж нерген каласкала.

 

– Мый Казахстанысе Караганда олаште актёр ешыште шочынам. Ачам – Иван Немцев. Авам, Ирина Фёдоровна, мый денем мӱшкыран лийын, декретыш лектын веле улмаш. Тунам тудым дене ик рольымак модшо актрисе кенета черланен. Садлан авамым спектакльыште модаш йодыныт. «Тый пеш чаткан киет ыле, мӱшкырем утыжым пале лийынат огыл», – ойла мылам авам. Ачам дене спектакльыште йӧратыше мужырым модыныт улмаш. Вот ик сцене годым авам камвозеш, ачам – ӱмбакыже. Ты жапыште мый авамын мӱшкырыштыжӧ тарваненам, савырнен возынам. Авам ачамлан шыпак тидым шижтарен. Тудыжо авамым эркын, шекланен кынелтымыж годым ончышо-влак актрисын мӱшкыран улмыжым ужын шуктеныт… Тунам уло зал рӱж совым кырен! Режиссёр мом ойлышашым пеш мастарын ончыктен манын шоненыт. Пуйто коктын возыныт, кумытын кынелыныт. А чылажат вучыдымын лийын. Ачам-авам тиде апплодисментым мылам пӧлекленыт. Тугеже тиде мыйын икымше ролем улмаш. Тунамак мыйын кӧ лийшаш улмем шотышто пӱрымашем рашемын, очыни.

Театр — йоча пагыт

Иван Немцевын йоча пагытше эре театр кулисе шеҥгелне эртен. Модыш-влак олмеш театрыште улшо тӱрлӧ арвер, бутафорий-влак лийыныт. Немцевмыт еш ик пагыт Российыш, Шадрин олаш илаш куснен. Вара, Иванын кудымшо классыште тунеммыж годым, Казахстаныш пӧртылыныт. Иванын ача-аваже тысе К.С.Станиславский лӱмеш драмтеатрыште пашам ыштеныт. Садлан эрге школ деч вара эре гаяк нунын паша верышкышт куржталын.

– Школым вашталтымылан кӧра мый ик жап тунемаш пешыже куанен омыл. Ковамлан «урокым ыштенам» манам да ача-авам дек театрыш куржам ыле. Мылам театрысе илыш йомакысе гай чучын. Сценысе огыл, а кӧргӧ илыш. Тӱрлӧ цехлаште мом ыштымым эскеренам. Тунам спектакльыште кӱлешан арверым кид дене ыштылыт ыле. Тиде мылам чот келшен. Мый шкежат тидым-тудым ыштылаш тунемынам. Чыла тидыже мыйым театрлан утларак да утларак шӱмаҥден.

Кугурак лиймеке, илышыште вашлиялтше умылыдымашым, чоным тургыжландарыше ситуаций-влакым шекланаш тӱҥалмеке, мылам театр вес могырым почылтын. Театр – сылне да весела вер веле огыл, тиде – шкешотан трибуно. Тышечын шылтен ойлаш, шонымым чоян каласкалаш лиеш. Сцене гычеҥ-влакын чоныштым тарваташ, илышым да шкеныштым умылаш тараташ лиеш…

Ойырен налме корно дене

– Мый паленам: ончыкылык илышем театр дене кылдалтеш. Вес паша нерген шонен кертын омыл. Ойлат вет: «Актёр паша профессий огыл, тиде – диагноз». Ик гана театр чонетым авалтен гын, тиде – эрелан.

Школ деч вара И. Немцев Карагандасе Таттимбет лӱмеш сымыктыш колледжыште тунемын, театр да кино артист специальностьым налын. Ты жапыштак Моско оласе современный гуманитарный академийыште психологлан тунемын. Вара Екатеринбургысо кугыжаныш театральный институтышто шинчымашым поген, ончыч актёр специальностьым налын, вара режиссёр лийын. Ойырен налме паша дене Иван Иванович 17 ий ила. Ончыч Карагандасе театрыште модын, 2013 ий годсек Г. Константинов лӱмеш Академический руш драмтеатрыште пашам ышта.

Писе лияш, чыла шукташ…

И. Немцев утларакше режиссёр семын пашам ышта. Кызыт У ий пайремлан келшыше йоча постановко-влакым ямдыла. Тылеч посна тений гыч И.С.Палантай лӱмеш тӱвыра да сымыктыш колледжыште актёр мастарлык шотышто курсым вӱда.

– Колледжыште кызыт «Театральное студенчество» фестиваль паша шолеш. Тудлан мыят вуйын шогем. Драмтеатрыште 83-шо тургымым почмо. Ончышо-влакым у оҥай спектакль-влак дене куандараш тӱҥалына. Кугыеҥымат, йочамат. Театрыште изи залым олмыктымо паша ыштен шукталтеш гын, эшеат шуко ӧрыктарыше постановко-влак лийыт. Теве Гогольын «Ночь перед Рождеством» произведенийже почеш проектым ямдылыме. Тудо илышыш шыҥдаралтеш манын ӱшанена. Чылажым ом каласе, театрышкына толыда гын, шке ужыда.

Роль йӧратыме лиеш мо?

– Мый дечем йӧратыме да йӧратыдыме роль шотышто чӱчкыдын йодыт. Но чын артистын йӧратыдыме рольжо лийшаш мо? Тыгайже улак гын, ала тудо профессийым йоҥылыш ойырен налын? Актёр кажне у геройжым йӧратен шындышаш. Рольышто, почын пуышаш образыште эре мо-гынат ӧрыктарыше, сай уло. Чумыр сандалыклан ик осал еҥ лийын ок керт. Илышыштат чылт осал да чылт сай айдеме уке. Лач ситуаций тӱрлӧ лиеш. Кажнын мо-ганат сайже да удаже уло. Осал койышан образым чоҥаш путырак оҥай. Тудым умылаш тунемат, сайжым кычалат, могай амал дене тыге але туге ыштымыжым умылтараш тыршет. Мыняр шуко тиде сомылым ыштет, тунар образ йӧратымыш савырна.

Мыйын эн йӧратыме ролем – эре пытартыш. Могайым пытартыш жапыште модынам да але марте модам? Мутлан, шукерте огыл Михаил Булгаковын пьесыж почеш шындыме «Зойкина квартира» премьерный спектакльыште Аметистовым рольжым модынам. Тудо – йӧратыме роль.

Еш альбом гыч налме фото-влак.