Оршанке район Кугунур селаште шочын-кушшо, Марий кугыжаныш университетыште 2-шо курсышто историй направлений дене тунемше Алина Смирнова – чолга, талантан ӱдыр. Поро да весела кумылжылан кӧра еҥ-шамыч дене кылым вашке муэш.
Олимпиадыш ушнен
Кугунур кыдалаш школышто тунеммыж годым Алина историй, обществознаний, ОБЖ да физкультур предметла дене районысо олимпиадылаште призовой верла дене палемдалтын.
– 1-ше гыч 9-ше класс марте «Шонанпыл» образцовый фольклор ансамбльыш коштынам. Тушто ийгот шот дене кум состав лийын. Тӱҥалтыш класс – тӱҥалтыш состав, 5-7-ше классла – кыдалаш состав, 8-11-ше классла – кугурак состав. Ме ятыр конкурсышто, концертыште участвоватлена, «Михаил Мурашко йолташыже-влакым ӱжеш» фестиваль-конкурсыш кажне ийын ушнена, тыгак Эстонийыште тӱнямбал фольклор фестивальыште лийынна.
Мыйын Захар лӱман шольым уло, тудо йочасадыш коштеш, тудат видеошто мыйын выступленийым ончен кушташ тунемеш. Шукерте огыл пӧръеҥ-шамычлан пӧлеклалтше концертыште Захарын куштымыжым йывыртен да кугешнен ончышым, – ойла А.Смирнова.
Спортым йӧратыше еш
Алинан ешыже спорт дене кылым куча. Аваже ончыч баскетбол дене модын гын, ачаже кызытат волейбол дене модаш коштеш. Нуным ончен, ӱдыр спорт деке шӱмаҥын, ече дене кужталмаште, биатлонышто таҥасен, «Лӱдыкшыдымылык школ» республикысе конкурсыш делегаций дене миеныт.
– 5-ше гыч 11-ше класс марте мый баскетбол командыште модынам. Ик модмаште пулвуйым эмгатенам. Туге гынат икымше курсышто тунеммем годым Марий кугыжаныш университетыште баскетбол дене тренировкыш коштынам, но пулвуй шкеж нерген палдарен, сандене модмым чарненам, лач мӧҥгыштӧ мечым оҥгыш кышкем. Спорт дене кыл мыланем дисциплиным кучаш, шкалан ӱшанаш, пеҥгыде койыш-шоктышан лияш туныктен, – палемда ӱдыр.
Весела студент жап
Историй направлений дене тунемме годым шке гыч шуко лудаш, дате-влакым шарнен кодаш логалеш. Сандене Алинан яра жапшат шагал, студентке тудым пайдалын эртараш тырша.
– Икымше курсышто тунеммем годым «Воскресений» студент поисковый отрядыш ушненам. Ончерыш коштынна да Кугу Ачамланде сар жап дене кылдалтше экспонат нерген палдаренна. Эн ончыч ӱдыр-рвезе-шамычлан кузе каласкалаш, кузе шкем кучаш тунемынам, вара шкежат ончаш толшо-влакым ончерна дене палымым ыштенам. Ик ий ты аланыште шуаралтынам.
Кокымшо курсышто йолташем «Марий мурсем» фольклор ансамбльыш ӱжын. Авам, лишыл йолташем, каласен: «Кидет-йолет мом ышташ кӱлмым палат, кай». Эн ончыч ӧрмалгенам, вет чылажат палыдымын чучын. Кок арня гыч мыйым концертыште кушташ шогалтеныт. Шижынат шуктен омыл, кузе коллектив деке шӱмаҥынам, йолташ-влакым муынам, – каласкала Алина.
Студентке моло уста ӱдыр-рвезе-шамыч дене пырля Москосо ЭКСПО-рӱдерыште «Интурмаркет» тӱнямбал турист ончерыште лийын. Тушто нуно республикнан этнический поянлыкше, самырык еҥын чолгалыкше дене палдареныт, марий куштымаш-влакым ончыктеныт.
– Ты ончерыште ик оҥай случай лийын каен. Воронеж областьын представительже-влак руш мурым муреныт, меат шке кундемысе мурынам шергылтараш шонен пыштенна. Тыге нуно рушла ик куплетым муреныт, вара ме иктым – марла, оҥай таҥасымаш лектын, – ойла студентке.
Алина книгам лудаш, сӱретым номер почеш сӱретлаш йӧрата, шукерте огыл почеламутым марла возаш тӱҥалын.