Марла кутырен моштышо татар-влакым вашлияш – мыланем кугу куан. Марий-влак южгунамже шочмо йылме дене пелешташ вожылыт гын, татар-влак чолгарак улыт. Параньга район Кугу Пумарий селаште илыше татар ешыште марий шӱлыш поснак шижалтеш. Харис Зульфаизович ден Альфинур Халиковна унам вашлийын моштышо, пайремым веселан эртарыше, пашаче улыт да тыгодым марий йылмымат палат. Тидыжак чонышто кугешнымаш кумылым луктеш.
Гаязовмыт еш Кугу Пумарий селаште ятыр ий ила. Тыматле, весела кумылан Альфинур Халиковна тутло чесым ямдылаш, сад-пакчаште шогылташ йӧрата. Шке ыштыме тӱрлӧ йомакысе персонаж-влак кудывече ден сад-пакчам сӧрастарат. А пеледышыже – шотлен пытарыдыме! Озавате тӱрлӧ сорт хризантемым, астрам, пионым, цинийым, герберым да молымат кушта. Пайрем ӱстелже тӱрлӧ татар кочкышлан поян. Пелашыже Харис Зульфаизович – кидмастар, чыла пашам ыштен мошта.
Изинек кожмак кушкын
Альфинур Халиковна йоча жапше годсек кожмак, пашам йӧратыше лийын. Тудо Марий Турек район Дружино ялыште индеш йочан ешыште кушкын. Изинек ача-авалан полышкален, тӱрлӧ пашам ыштен. Лыжган мутланыше, илыш нерген келгын шонен моштышо, тыматле кумылан ӱдырамаш эртыше пагытше нерген мылам шуко каласкалыш. Ача-аважын тукымжо – Татарстан кундемыште. Тушто илыше родыжо-влак дене пеҥгыде кылым куча, телефон дене мутлана.
– 1965 ийыште ешна Татарстан Республик Чулпан ял гыч Марий Турек район Дружино ялыш илаш куснен. Тунам мый пел ияш гына лийынам. Ачам колхозышто комбайнерлан, трактористлан ыштен. Авам шуко жап йоча дене шинчен. Ме пашам ыштен кушкынна. Йошкарушмен пасушто, пареҥге пакчаште шӱкым эре кӱрынна, кугурак лиймеке, ачалан полышкалаш коштынна. Кок ий ачам воктене комбайнерын полышкалышыжлан тыршенам.
Жап эрта, ачам ден авам илыш дене чеверласеныт. Пайрем годым ме чыланат ача-авамын суртышкыжо рӱж погынена, эртыше пагытым шарналтена. Эн лишыл родо-влакем 90 еҥ наре погына. Шочмо суртыштем кызыт шольым ила, а молышт – Марий кундемын тӱрлӧ верыштыже, – мане А.Гаязова.
Икте – ветеринар, весе – шофёр
Альфинурын йолташ ӱдыржын аваже презым ончен. Кок ӱдыр тудын деке полышкалаш чӱчкыдын коштын. Тыге Альфинур Халиковнан вольыкым йӧратыме кумылжо лектын. Тудо ветеринар лияш моткоч шонен. Дружино ялысе кандашияш школым тунем пытарымеке, шонымо семынак Марий Турек посёлкысо СПТУ-шко ветеринарлан тунемаш пурен. Ты пагыт самырык ӱдырлан волгыдо йӧратымашым пӧлеклен. Училищыште Параньга район Хасан почиҥга гыч шофёрлан тунемше Харис дене палыме лийын, келшаш тӱҥалыныт. Варажым тунемме жапыштак возалтыныт. Дипломым налмеке, самырык вате-марий Хасан почиҥгашке илаш куснен, варажым – Кугу Пумарий селашке.
Альфинур Халиковнам паша корно Кугу Пумарий селасе совхозышко конден. Тудо фермыште ветеринарлан пашам ышташ тӱҥалын. Пелашыже Шернур посёлкышто газ дене кылдалтше ик организацийыште тыршен, варажым окса чӱдылыклан кӧра Йӱдвелышке куснен, тушто автогрейдеристлан ыштен. Совхозышто тыршыме жапыште А.Гаязовалан ик пӧлеман, варажым кум пӧлеман пачерым ойыреныт. Вате-марий тачат туштак ила.
Марла кутыраш тӱҥалын
Кугу Пумарий селаште илен, Альфинур Халиковна марий калыкын илыш-йӱлаже, тӱвыраже, муро-куштымашыже да йылмыж дене кумданрак палыме лийын. Сӧсна комплексыште ветеринарный врачлан пашам ышташ тӱҥалмекыже, тудо марла кутыраш тунемын. Пелашыже марла сайын огеш умыло, но Эльвира ден Альфира ӱдырышт авашт семынак марла лывыргын мутланат.
Умбакыже 17 июньышто лекше у номерыште лудса.