Марий Элыште илыше да частичный мобилизаций дене военный службыш налме еш-влаклан кузе полшат? Республикыштына 50 тӱжем теҥгем ойырат. Кажне регионышто тиде цифр тӱрлӧ.
Ешын социальный паспортшо
Марий Элым Вуйлатыше Ю.Зайцевын кӱштымыж почеш мобилизоватлыме ешлан социальный паспортым ыштат. Военкомат-влак калыкым социально обслуживатлыме рӱдерлашке спискым колтат. Нине ешлашке специалист-влак йыҥгыртат, илыме верлашкышт миен коштыт. Ешыште улшо нелылык нерген социальный паспортыш возат. Нуным шуктымо шотышто социальный службыш, моло ведомствыш, верысе администрацийыш лектыт.
Тыгак нине ешласе еҥ-влак шкешт калыкым социально обслуживатлыме рӱдерыш миен кертыт. Чыла йодыш дене сутка мучко Единый диспетчерский службыш (21-00-89) йыҥгырташ лиеш.
Йоча-влаклан
Социальный паспорт дене келшышын, республикыштына мобилизоватлыме-влакын шочшыштлан «Журавушка» социально-реабилитационный рӱдерыште канаш путёвкым ойырен кертыт. Тидлан ача-авалан (законло представительыштлан) районысо але оласе калыкым социально обслуживатлыше комплексный рӱдерлаште направленийым налман. Йошкар-Оласе Калыклан психолого-педагогический да социальный полышым пуышо «Доверие» рӱдерыш миен, (Эшкинин урем, 1-ше №-ан пӧрт) йодмашым возыман, ача-аван але законло представительыштын, йочан документышт ден копийыштым намийыман.
Тыгак мобилизоватлыме еҥын шочшыжо Марий Элыште бакалавриат ден специалитет программыла дене кӱшыл шинчымашым налеш гын, республикысе бюджет ассигнований гыч 2000 теҥге стипендийым тӱлаш палемдыме.
Ача-аваштлан
Социальный паспорт почешак мобилизоватлыме еҥын ача-аважлан кӱлеш полышым социальный службо пуэн кертеш:
– черет деч посна мӧҥгыштӧ обслуживатла;
– черет деч посна пӧрт-интернатыш путёвкым пуа.
Нине йодышла дене калыкым социально обслуживатлыше рӱдерлашке лекман.
Медицине
Специальный военный операций гыч толшо военнослужащий-влаклан чыла медорганизацийыште черет деч посна медицине полышым пуаш палемдыме. Тыгак реабилитацийым тӱрыснек эртыме годымат. Тидын шотышто консультацийым налаш «шокшо линий» пашам ышта, телефон номерже – 122.
Социальный контракт
Социальный контрактым подписатлыше (шке пашам почаш пуымо программе дене налме оксам) мобилизоватлыме еҥ-влакын контрактыштым шуят але ончылгоч колтат гынат, оксам мӧҥгеш огыт йод. Социальный контракт пытыме але тудым шуйымо нерген уверым саде рӱдерлашке колтат.
Статус
Мобилизоватлыме еҥ-влакын социальный гарантийышт:
– специальный военный операцийыште лийше-влаклан боевой действийын ветеранже статус пуалтеш;
– сусыргымеке, единовременный выплатым тӱлат (3 млн теҥге марте);
– страховой выплате (7 млн теҥге марте).