Инжирыште улшо эфирный ӱй-влак вӱрым саемдат да тудлан нугыдемаш огыт пу. Инжир аспирин таблетке олмеш пеш пайдале. Кажне кечын ик саска дене кочман, тыге ик тылзе эмлалтман.
Уш дене пашам ыштыше да творческий еҥ-влаклан инжирым кочман.
Кугу температур, ангине, умша кӧргӧ инфекций, бронхит годым кок стакан шокшо вӱдыш ик кугу совла тыгыдемдыме инжирым пыштыман, лу минут шолтыман. Йӱкшымеке шӱрыман да кечеш ныл ганалан пайлен йӱман.
Нойымо, вий уке, пуштыланыме годым ик стакан шокшо шӧрыш 4-5 инжирым пыштыман, иктаж 15 минут шинчыктыман. Вара саскам лаштыртыл шалатыман да кечеш кок-ныл гана кочман.
Шондыгалташте кӱ улмо, цистит, пиелонефрит годым 200 мл шокшо вӱдыш 3-5 инжирым пыштыман, изи тулышто лу минут шолтыман да саскам сайын лаштыртылман. Кочмо коклаште кечыгут кочман.