Соцкылыште ик рвезе дене палыме лийынам. Тудо мый дечем ныл ийлан изирак, ик кугу олаште илен. Тунам мый институтым тунем пытаренам гын, тудо – школым. Пел ий наре вашла серышым возкаленна. Тыгодым икте-весе деке нимогай шижмаш, йодмаш лийын огыл. Тыге жап веселарак эрта манын, коктынат шоненна. Но пел ий гыч тыге возкалымаш кугу интернет-йӧратымашыш савырнен.
Школым пытарымеке, саде рвезе мыйын илыме оласе вузышко тунемаш пураш шонен пыштен. Тыге икымше гана вашлийынна. Толмыж деч вара кумшо кечынже ола мучко коштмына годым мыйым да шӱжарем машина тӱкен. Операцийым ыштеныт, костыль дене кошташ логалын, тазалыкым пеҥгыдемдаш ятыр жап кӱлын. Но тыгодым ты рвезе эре пеленем лийын: вакшышыште кынел кертде кийымем годым шагат дене кидем кучен шинчен, уэш кошташ тунеммем годымат вӱден коштын. Тылеч ончыч нигӧ деч тыгай порылыкым, тынар лыжга мутым, йӧратымашым шижын да омыл ыле.
Интернетыште палыме лийме йолташем тунемаш пурен, мыйын илыме олаштем кодын. Ме кажне кечын вашлийынна, тӱрлӧ нерген мутланенна, уремыште шуко жапым эртаренна. Молан мый тидын нерген возем? Шке еҥдам вашлийыда гын, тудын ийготшо, тораште илымыже шотышто вуйдам ида аҥыртаре. Йӧратыза, сайлан ӱшанен илыза!
Катя Н.
Йошкар-Ола.