Кызыт интернет деч посна илашат огеш лий. Тушто шуко кӱлешан уверым муаш, ятыр пашам ворандарен колташ лиеш. Еҥ-влак интернет дене чот пайдаланат? Тидын шотышто вашмутым Маристат пуа:
– 2022 ийыште Марий Элыште калыкын интернет дене пайдаланымыжым эскерымеке пале лийын: 78,2 процент суртлаште интернетыш лекташ кыл уло. Интернет дене пайдаланаш манын, кундемыштына илыше кокла гыч 75,1 процент еҥже мобильный устройствым кучылтеш.
Пӧртыш пуртымо интернет дене 15 ияш гыч 74 ияш марте тӱшкаште 98,8 процент еҥ пайдалана, пашалан кӧра – 53,7 процент еҥ.
15 ияш деч кугурак еҥ-влак кокла гыч 39,9 процентше интернет гоч сатум да услугым налеш. 2021 ий дене таҥастарымаште тыгай йӧнлан 2,7 процентлан шукынрак эҥерташ тӱҥалыныт. Интернет гоч сатум налше-влак кокла гыч 45,7 процентше – оласе еҥ, 28,3 процентше – ялысе.
Интернет гоч тӱрлӧ ведомствын услугыжымат налаш йӧнанрак, нигуш коштман, черетыште шогыман огыл. Кугыжаныш да муниципальный услугым налше 15-72 ияш-влак коклаште 88 процентше интернет дене пайдалана: 90,3 процент – олаште, ялысе-влак коклаште – 82,3 процент.