Мый йоча психолог лияш ямдылалтынам. Ты профессий чонемлан келшен. Но икымше практике шонымашем вашталтен.
Практикым интернатыште эртенам. Тудыжо тошто пионер лагерьын зданийыштыже верланен. Ончылныжо кушкын пытыше тӱрлӧ вондер ден пушеҥге лийыныт, шемемын пытыше статуй-влак шогеныт. Йоча-шамыч тошто, шӱдӧ пачаш мушмо пижамым чиеныт. Нуно ачаш- пачаш тумыштымо простыньышто маленыт. Очыни, кугыжаныш могырым черле йоча-влакым ончаш кугу окса ойыралтын огыл. Садлан нуным мо уло дене онченыт. Интернатыште ача-ава деч посна кушшо, тӱрлӧ чер дене орланыше икшыве-шамыч иленыт. Нуно «ава» мутым ик ганат ойлен огытыл. Очыни, ты мутын значенийжымат огыт пале. Тысе йоча-шамыч чыташ лийдыме корштымым эреак шижыныт. Нунын ончыкылык илемышт – шӱгарла. Йоча годсо пагытыштым ыресыш пижыктыме фотокартычке веле шарныкташ тӱҥалеш.
Мыланем тушто мо ышталтмым эскераш чот йӧсӧ лийын. Йоча-шамыч вес тӱняш каяш еретыштым вучен илат. Мо эн лӱдыкшӧ – нуно тушко писынрак каяш шонат.
Южгунам йӱдым дежурствышкат кодаш логалын. Ик гана дежуритлымем годым кок йоча колен: Ваня ден Серёжа.
Йоча-шамычлан чот неле лиймеке, нуным посна палатыш кусарат. Ваня ден Серёжа эше шӱленыт. Кум шагат гыч куд шагат эр марте мыланем нуным оролаш кӱлын. Воктенышт шинчылтмем годым Серёжа мыйым Ваням ончалаш йодын. Тудо мыланем ала-мом ойлынеже, манын. Такшым Ваня мутланенжат огыл. Лишкырак мийымеке, тудын ош шинчажым веле ужынам. Врачым шӱдаш кнопкым темдалынам. Тудым вес вере наҥгаеныт. Палатыште Серёжа дене коктын кодынна. Мый окна воктене шинчылтынам, окна янда гоч рвезын шӱргыжым эскеренам. Кенета фортычко почылтын, мардеж пуалме дене занавеске шӱргем ниялтен. Лӱдмем дене тӧршталтенам, пӱкенемат камвозын. Серёжамат ты йӱк дене лӱдыктенам манын шоналтенам да тудын деч тидлан прощенийым йодынам. Тудыжо Ваня чеверласаш толын, мыят тыге толам чай, ит лӱд манын. Эр велеш Серёжат кайыш. Тудо мый денем вес семын чеверласыш. Почешыже вакшышым эрыктыме годым простыньжо вачышкем туге камвозо, пуйто мыйым ныжылгын ӧндале. Чонемлан ко-о-о-опыж чучо…
Тушто практикым эртыме деч вара университет гыч каенам. Тидлан ачам ден авам мыйым вурсеныт, пырля тунемме-влак икымше практике деч вара вигак тунеммым шуымем шотышто койдарен ойленыт. А мый вес семын кертын омыл. Мыланем йоча-влакым вес тӱняш ужаташ чот йӧсӧ лийын.
Рита. А.
Килемар посёлко.