Тыгай тӱнямбалысе выставке 8-11 июльышто Екатеринбургышто эртаралтын.
Тудын тӱҥ темыже – «Технологический партнёрстве: ончыкылыкын образшым шочыктышыла». Ончерыште 46 тӱжем утла уна лийын.
Мемнан республикысе делегацийым Марий Элым Вуйлатыше Ю.Зайцев вуйлатен. Марий Элын стендыштыже кундемнан 9 промышленный компанийже шке сатужым да разработкыжым темлен. Нунын коклаште машиностроительный отрасльысе предприятий да инновациян разработкым ямдылыше компаний-влакат улыт: «НПФ «Мета-хром» ООО, «МЕТМА» АО, «Мехатронные системы», «Неон+», «Росхолод-импэкс», «Санда-М», «Технотех», «Эворус» да «ОПКБ Экспломет» ООО-шамыч.
Ю.Зайцевын мутшо почеш, стендыштына оборонысо заказым шуктышо предприятийымат ончыктымо. Республикыштына оборонно-промышленный комплекс ден радиоэлектронике предприятий-влак вияҥыт, нунышт чумыр сату ден услугым пуышо радамыште 20 процентым айлат. Кӱкшӧ технологиян сатум ыштен лукташ, микроэлектроникым да специалист-влакымат ямдылаш кӱлешан научно-шымлыме базе уло.
Ю.Зайцев промышленный производство йодышым Ульяновск областьын губернаторжо А.Русских дене вашлиймашыште кутырен. Нуно кок могырым кылым ыштымым, промышленностьым тӱзатымым да амалкалче-шамычлан полшымо пашам каҥашеныт.
Предприятийна-влак кӱкшӧ технологийым кучылтыт, тӱжем утла тӱрлӧ сатум ыштен луктыт. Марий Эл торгово-холодильный оборудованийым, электроустановочный изделийым, кӱртньӧ омсам, хроматографым, светодиодный экраным да моло сатумат ыштыме дене Российыште ончыл радамыште кая.
Марий Эл Правительстве инвестиционный проектлам шуктымаште да у производствым кумдаҥдымаште кӱлеш финанс, организаций да информаций полышым пуа.
Марий Элым Вуйлатыше Ульяновск областьын стендшым ончен лектын. Нунын коклаште авиационный промышленность ден БПЛА-м ыштымаш, металлообработко, машиностроений да промышленностьын моло направленийжат улыт.
Д.Речкинын фотожо/ Марий Элым Вуйлатышын пресс-службыжо.