9-12 июньышто Медведево районысо Кугу Шаплакыште имньым кушкыжын кудалме дене Марий Эл Республикын первенствыже эртаралтын. Тушто 70 сантиметр кӱкшытан чаракым сеҥыман маршрутышто икымше верым Йошкар-Оласе олимпийский резерв училищын студенткыже Мария Конюхова налын. Ӱдыр тыгак 80 сантиметр кӱкшытан чаракым сеҥыме маршрутышто кумшо лийын.
Аваже кумылаҥден
Мария кокымшо курсым тунем пытара. Ончыкыжым тренер лияш шона. Йоча-влакым имньым кушкыжаш туныкташ, тӱрлӧ таҥасымашышке ямдылаш кумылжо уло. Ты спортыш тудо лу ияш улмыж годым толын. Тидланже аважлан таушта. Вет Мария изинек тудын дене пырля ятыр таҥасымаште лийын. Туштыжо имне дене тыглай кудалмым огыл, а чаракым сеҥен, тӧрштылын кудалмым ончаш йӧратымыж нерген палдарыш. Умбакыже тыгерак каласкалыш:
– Имне дене кандаш ий утла пашам ыштем. Идалык наре заниматлымеке, икымше таҥасымашке лектынам. Тунам призовой верыш логалын омыл гынат, тренерын кӱштымыжым шуктенам. Маршрутым сайын эртенам, чарак-влак 80 сантиметр кӱкшытан лийыныт.
Арняште куд кечым тренировкылан ойырем. Конешне, тунемме годым заниматлаш нелырак, туге гынат тренировкым кодаш ом тырше. Занятий-влак кумыс фермын кумдыкыштыжо эртат. Тренерем – Ирина Валерьевна Пуртова. Моткоч тале, поро чонан, спортсмен-влак дене пашам ыштен моштышо ӱдырамаш. Кызыт мый «Семол» командын участникше улам.
Такшым имньым кушкыжын кудалыштме спорт моло деч ятырлан ойыртемалтеш. Вет спортсмен шканже веле огыл, тыгак имньылан мутым куча. Садлан тренировко деч ончыч вольык нергенат шоналтыман, – мане Мария. – Имньым кушкыжын кудалыштме годым айдемын чыла гаяк чогашылже пашам ышта. Тыгак стресс деч утлаш, нойымым чактараш сай йӧн. Имне дене мутланыме годым чон йывырта, кумыл нӧлтеш. Палемдыман, ты спорт тыгак мотор капкылан лияш полша. Очыни, эн кугу лӱдмашыжым сусырген кертмаш луктеш, но могай спорт тудын деч посна лиеш?
Камвозыт — уэш шинчыт
«Тый имне ӱмбач иктаж гана камвозынат?» – йодым тудын деч. Вашмут тыгайрак лие:
– Тынар ий жапыште мыняр гана камвочмемым шотленат пытараш огеш лий. Нерымат катенам, эмлымверыштат киенам. Тушечын лекмеке, вигак манме гай тренироватлалташ тӱҥалынам. Имнешке-влак камвозыт гынат, кынел шогалын, умбакыже мом ыштен кертдымыштым тӧрлаш пижыт. Кокымшылан камвозыт, садакат имне ӱмбак шинчыт. Нунын вий-куатышт, ончыко каяш тыршымышт дене чот кугешнем.
Имньым тренировкылан ойырымо, нунын дене пашам кузе ышташ кӱлмӧ нерген йодыштмо годым тыгерак каласкалыш:
– Спортыш толмо почеш тӱрлӧ имне дене тренироватлалтынам. Тидыже имне дене пашам ышташ, нунын дене кылым муаш сай йӧным пуа. Ныл ий наре кок имне дене заниматлем. Иктыж дене – тренировкышто, Сэйра дене таҥасымашлашке лектам. Тудо мыланем тыглай вольык огыл, ме шукертсек йолташыш савырненна. Кызыт кок чома дене кылым ыштенам. Ончыкыжым нунын дене пашам ышташ шонем.
Имньын кумылжым шижын моштыман. Тренировкылан але таҥасымашлан ямде огыл гын, умылыман да кумылаҥдаш тыршыман. Мый йолташемым кешыр але сакыр дене куандарем. Тренировко годым мокталтем, вӱчкалтем. Поро мутымат чаманыман огыл, «Молодец», «Умница», «Отлично» чӱчкыдын манам.
Чынжымак, кеч-могай пашан лектышыже тауштымым, вий-куатын надыржым онча. Нимогай сеҥымаш пӱжвӱдым йоктарыде, вийым пыштыде огеш тол. Спортыштат тыгак. Садланак, сай результатыш шуаш манын, Мария Конюхова арняште куд кечыжым тренировкылан ойыра. Вес семын чемпион лияш огеш лий.
Ӱдырын альбомжо гыч налме фото-влак