4 февральыште Карелий Республиксысе изосымыктыш тоштерыште «Ход конём» ончер почылтын. Тушто XIX–XXI курымласе Российысе да йотэлласе скульптор, художник, живописец, декоративно-прикладной искусствын мастарже-влакын шӱдӧ наре пашашт ончыкталтеш. Ончер 2 апрель марте шуйна.
– Ты ончер мландымбалне эн мотор да поро вольыклан – имньылан –пӧлеклалтын. Кажне паша ончаш толшо еҥын чоныштыжо могай-гынат кышам кодышаш. Нуно шкешотан, ойыртемалтше улыт. Тылеч посна тоштерыш толшо-влаклан тӱрлӧ мастер-классым эртарена. Мутлан, кумыж гыч имньым ышташ але сӱретлаш туныктена. Тыгак икшыве-влакым изи капан имне дене шинчыктен коштыкташ шонена. Тидланже ме Петрозаводск оласе изи имне-влакым ончышо рӱдер дене кутырен келшенна.
Экспозиций-влакым тоштерысе ныл залыште вераҥденна. Икымше залыште кызытсе художник-влакын пашашт ончыкталтеш. Нуно шке пашашт гоч имне-влакын образыштым, тӱняумылымашыштым почыт. Кокымшо залыште XIX курымысо мастар-влакын пашаштым чумырымо. Кумшо залыште ме имне-влаклан келыштаралтше арвер ден ӱзгар-влакым погенна. Тидлан тӱрлӧ национальностян калыкын кажне курымышто кучылтмо ӱзгаржым муаш тыршенна. Мемнан шонымаште, тиде моткоч кӱлешан паша. Вет самырык-влак имне нерген шагал палат. А тыште эше нунын паша арверышт ончыкталтеш. Тылеч посна Максим Роговын «Сон» видео-артшым ончаш темлена. Тыгак архивысе фото ден моло паша-влакым ужаш лиеш, – палдарыш тоштер пашаеҥ, «Ход конём» ончерын кураторжо Юлия Апроду.
