Илышын кажне татшым шижын мошта

Светлана Васильеван тӱрлӧ вере коштмыжым ынде пел ий наре интернет гоч «эскерен» шинчем. А тудо мыйын гай мӧҥгӧ гыч тораш каен кертдымылан сӧрал вер гыч фотовлакым лаштыкыштыже вераҥда. Тиде чолга да чулым ӱдыр дене тендамат палымым ыштынем.

– 2012 ийыште нылымше курсышто производственный практике лийшаш ыле. Тӱнямбал программе дене ныл тылзылан Лейпциг олаш колтат улмаш. Тидлан немыч йылмым палаш кӱлын. А мый школышто да университетыште икымше-кокымшо курслаште англичан йылмым тунемынам, сандене кумшо курс гыч репетитор дене заниматленам. Нылымше курсышто, тиде программыш логалаш манын, кок кутышан тергымаш лийын. 15 еҥ гыч визытын веле эртенна. 2012 ий апрель мучаште Германийыш каенна. Пел ийыште шуко оҥайым ужынам. Каныш жапым пайдалын эртаренна, шуко олаш кудалыштынна.

Тылеч вара чон адак иктаж вере каяш ӱжын?

– 2014 ийыште Германийыш тӱнямбал кӱкшытан вес программе дене ешыш йочам ончаш каенам. Контракт дене ик ий пашам ыштенам. Тиде пагытыште каныш годым 14-15 элыш миенам.

Вес элысе еш менталитет мемнан деч ойыртемалтеш мо?

– Немыч-влак дене таҥастараш гын, ойыртем шижалтеш. Мемнам изи годсек ешым погаш, тудым аралаш туныктат гын, нуно тидын шотышто вес шонымашан улыт. Иностранец-влак ондак тунемын лектыт, пашам ыштат, ончыкылыклан оксам погат, вара веле ешым чоҥымо нерген шоналтат. Шийвундо шотышто чот пеҥгыде улыт. Кевытыш каят гын, уто сатум огыт нал. Вӱдым, тулым чот аныклат. Тиде, очыни, коммунал услугылан оксам шуко тӱлымӧ дене кылдалтын. Пӱртӱсым йӧратат да жаплат, санденак тушто чыла вере ару. Айдеме семын нуно поро, эре полшаш ямде улыт. Полышым чӱчкыдын йодаш логалын, иктат савырнен каен огыл.

Шукерте огыл эше ик оҥай верыш изи пуш дене вӱд дене воленда. Тидын нерген интернет лаштыкыштет палемдыме ыле.

– Кеҥеж тӱҥалтыште Пермь кундем Усьва эҥер дене сплавыш миенна. 10-12 еҥ чумырген. Тиде путешествийым сай йолташем, Олег Патраков, эртара. Тудо кок ий утла тыгай каныш мероприятийыш еҥ-влакым пога.

Кызыт кушто улат? Могай кундемым шымлет?

– Шукерте огыл Кавказыш миенам. Тудын сӧраллыкшым фотом ончен ужыда, шонем. Шке шинча дене ужмым, тусо курык южым шӱлымым каласен, умылтарен мошташ ок лий. Шке миен толза, ончалза. Тушко каяш отпускым идалык ончычак планироватленам. Июньышто сплавыш мийыме годым кум кече кӱлеш ыле. Кок кече канышем лийын, а кумшо кечыжлан ончылгоч пашам ыштенам. Ик кечаш походыш я фестивальыш каныш годым коштам. Мероприятий паша кечылан логалеш гын, шагал годым йодын каем.

Шӱжарет, тыйым ончен, путешествийлан кумылаҥын огыл?

– Кодшо ийын тудым Озаҥ ола воктене верланыше Голубой ерыште сапсёрфинг дене кошташ кумылаҥденам. Тудлан тиде моткоч келшен, но тора кундемыш каяш шийвундат шукырак кӱлеш. А студентын уто оксаже уке.

Ужын коштмеке, йӧршын у шижмаш шочеш. Тый палыдыме верыш логалат, шуко еҥым вашлият. Нунын – шке тӱняумылымашышт, шонымашышт, чон поянлыкышт. Икманаш, вес илышым илет. Коклан айдемым книга семын лудашат логалеш, тунар оҥай улыт. Нунын шонымашыштым южгунам шкеат шарнет, эсогыл пайдале каҥаш семын кучылтат. Чыла тиде «илыш пазлым» погымаште ик изи ужаш. Пӧртылмеке, миен толмо нерген кужу жап шарнет. Тудо пашам ышташ, илаш, умбакыже шуаралташ ешартыш вийым пуа!

 С.Васильеван альбомжо гыч налме фото-влак.