15-21 апрель – Вӱрым пуаш кумылаҥдыше арня (Российыште Донорын кечыже вашеш)
Вӱр да тудын компонентше эмганыше еҥлан туткар лиймеке веле огыл, сусыргымо, операцийым, азам нелын ыштыме годым вӱр чот йогымо, когаргыме годымат кӱлеш. Садлан вӱрым эре сдатлыше еҥ-влак «шып подвигым» ыштат, палыдыме еҥ-влакын илышыштым утарен кодат. Тидын нерген Республикысе вӱрым пуымо станцийын тӱҥ врачшын алмаштышыже Лилия Хабибуллина каласкала.
2023 ийыште Вӱрым пуымо республикысе станцийыште 7983 еҥ вӱржым да тудын компонентшым пуэн. Чылаже 5896,4 литр вӱрым ямдылыме. Стационарыште 15 донор акцийым эртарыме, кумытым – лектын коштын. Вӱрым пуышо пашам ыштыше еҥ-влаклан кок донор шуматкечым эртарыме.
Донор акцийлаште республикысе тӱрлӧ предприятийын: Марий машиностроитель завод, Йошкар-Оласе полупроводниковый прибор-влак завод, ТЭЦ-1, ТЭЦ-2, Росгвардийын Марий Эл Республикысе управленийже, МЧС, УФСИН, Суд пристав-влак службо – пашаеҥышт-влак ушнат.
Кӱшыл ден кыдалаш специальный тунемме тӧнежлан: МарГУ, ПГТУ, Йошкар-Оласе медколледж, Автодорожный техникум – студентышт ӧрдыжеш огыт код. Акцийыш Тазалыкым аралыме, Пӱртӱс поянлык, экологий да йырвелым аралыме, Цифровой вияҥмаш министерстве-влакын, банк системын, Федеральный казначействын, Рӱдӧ библиотеке системын пашаеҥже-влак ушненыт.
Тыгай тӱшка акций-влак – коллективым иктыш чумыраш сай йӧн, вет поро паша эре лишемда.
Донор толкыным пропагандироватлымашке мер организаций-влакат ушнат. Волонтёр-медик-шамыч тӱрлӧ викториным ямдылат, донор-влак коклаште йодыштмашым эртарат. Йоча усталык коллектив-влак «Донорство» темылан, сӱретым сӱретлат, вара нуным Республикысе станцийын пырдыжешыже Донорствын национальный да тӱнямбал кечышт вашеш вераҥдена.
2024 ийыште, Ешын идалыкыштыже, Здравоохраненийым вияҥдыме Национальный фондын темлымыж почеш, «Семейный код донора» всероссийский акций-конкурс эртаралтеш. Акцийын шонымашыже – еҥ-влакым вӱрым да тудын компонентшым пуаш тараташ, пропаганде шотышто у форматым муаш, донорствыш ушнымаште еш йӱлам вияҥдаш.
Еш йӱла Вӱрым пуымо станцийыштат виян. Тыште ыштыше 26 утла еш вӱрым да тудын компонентшым эре пуа. Икмыняр тукым дене «Почётан донор» лӱмым нумалше еш-влакат улыт.