31 мартыште М.Шкетан лӱмеш Марий драмтеатрын сценыштыже кундемнан чолга мыскарачыже-влак погыненыт. Тидлан амалжат лийын, вет «Кугарня» газет редакций воштылмо кече вашеш йӱлаш пурышо «Воштылаш, товатат, сулык огыл!» мыскара фестиваль-конкурсым 29-ше гана эртарен.
Гран-при – Советский кундемын
Лу участник ончаш толшо-влакым тӱрлӧ сценке, монолог, мыскара муро дене воштылтен. А вӱдышӧ-влак Шкетан лӱмеш театрын артистше С.Александрова ден Г.Тимиряев ты каслан шкешотан ямым пуртеныт. Нунын «тандемышт» шыргыжаш таратыше, кызытсе илышлан келыштаралтше лийын. Тыгак М.Шкетан лӱмеш Марий драмтеатрын артистше-влак М.Медикова, С.Строганова, А.Бусыгин, А.Сандаков куандареныт.
Мыскараче-шамычым икмыняр номинацийыште палемденыт. Гран-прим Советский район Кужмарий гыч В.Ефремова ден В.Мочаева «Семон кайыш» сценкышт дене налыныт. Икымше верым В.Горохова ден Качери бавай, кокымшым Морко район Коркатово тӱвыра пӧртын пашаеҥже-влак В.Фёдоров, В.Петров, В.Фёдоров «Султан» сценкышт дене, кумшым Оршанке район Кугунур гыч Р.Кудрявцева ден И.Кудрявцева «Марийым кычалам» мыскарашт дене суленыт. Зритель-влакын кумылыштым савырыше номинацийыште Йошкар-Ола гыч «Падыраш» йоча фольклор коллективышт палемдалтын. Тыгак кумылаҥдыше пӧлек-влак дене Морко районысо рӱдӧ книгагудын пашаеҥже-шамычым, Шернур районысо «Пӧлек» фольклор ансамбльым, Йошкар-Оласе «Ший оҥгыр» ансамбльым, мыскара кумылан Йырмарийым палемдыме.
Усталыкыштым таптат
Морко районысо книгагудо пашаеҥ-влак «Моторлык марий ватым сӧрастара» сценкым ончыктышт. Мотор вате-шамычым ончен, чынжымак, тыге шоналташ лиеш. Вет кажныже могай-гынат вургемым чийымыж, сӧрастарыше арверым пижыктымыж дене тыге умылаш таратен. Сценкын авторжо библиограф Людмила Ивановна Александрова. Участник-влак дене мутланышна, нуно тыгерак ойлышт:
– Книгагудыштына театрилизоватлыме представлений-влакым чӱчкыдын эртарена. Тушто тӱрлӧ номерым шындена. Тений ты мыскара фестиваль-конкурсыш ушнаш кумылаҥна. Тидлан лӱмын сценкым ямдыленна да тудын дене Советский посёлкышто эртаралтше отборочный турышто выступатленна. Тушто ме кумшо верым налынна.
Такшым книгагудышто пашам ыштена гынат, тӱрлӧ шӧрыныштӧ шкенам ончыкташ тыршена. Икмыняр мурымат возенна. Ме ны профессионал мурызо, ны артист огынал. Туге гынат усталыкнам таптен шогена. Ме икте-весе коклаште эреак мыскарам ыштылына, тидлан огына сыре. Вет тыге илашыжат каньылырак.
Чылажат – «канде-пелганде»
Оршанке район Кугунур гыч Римма Алексеевна Кудрявцева «Канде-пелганде» мыскара мурыж дене ты номинацийыште икымше лийын. тудын Илышыште мыскаран вержым тудо тыгерак умылтарыш:
– «Кугарня» газетын эртарыме мыскара конкурсыштыжо ятыр гана лийынам. Шкетан лӱмеш театрын сценыштыже икымше гана выступатленам. Мый Яков Павловичын землякше улам. Сандене модмо годым чоныштем ойлен моштыдымо вий-куатым шижым. Ты сценыште выступатлымемлан поснак йывыртенам.
Тӱҥ шотышто сценарий-влакым шкеак келыштарем. Мыйын сай полышкалышем – Елена Сергеевна Рыбакова. Тудын дене шкенан клубышто шуко тыгай номерым шынденна, ой-каҥашыже мыланем моткоч шерге. Тыгак пелашемын полшымыжым пуымыжым аклем. Вет кеч-можат вигак ок возалт. Тидым, тудым тӧрлаташ логалеш. Южгунам идей йӱдым але эр эрдене толеш. Тыгай годым возенак кодаш тыршем. Сценарийым, почеламутым, ойлымашым возымо годым могай-гынат ойыртемым пурташ тыршем. Мутлан, иктаж темым почын пуынет гын, тудым вигак ончыкташ але тӱрлӧ семын савыркалаш лиеш. Шукыж годым кокымшыжлан эҥертем. Тыге оҥайрак, шонем.
Ме кок номер дене толынна. Ик сценкыжым Ирина Кудрявцева дене модна. Коктынат Кугунур тӱвыра пӧртысӧ «Какшан сем» ансамбльыш коштына. Ты мыскарам уэмдыме, профессионал-влакын каҥашыштымат шотыш налме.
Мыскара айдемын илышыжым сӧрастара, вуйушым саемда, кумылым нӧлта. Сандене кажне еҥ тидым умылышаш, шонем, поснак – тачысе кечын.
«Воштылаш, товатат, сулык огыл!» мыскара фестиваль-конкурсна икшырымын эртыш. Сай сценарий, уста вӱдышӧ, оҥай мыскара-влак кумылым савыреныт. Тыге жап эртымымат шижме огыл. А вет мероприятий кум шагат утла каен. Сандене ты мероприятийым эртараш полшышо, тушко ушнышо чыла гаяк участник ден ончаш толшо-влаклан моткоч кугу тау!
И.Речкинын фотожо-влак.