Кужэҥер район Старсела гыч Николай Таныгин – специальный военный операцийын участникше, рядовой. Тудо Луганск Калык Республикыште стрелковый батальонышто служитла.
Николай шке кумылын шочмо элым аралаш каен. Тылеч ончыч Россий мучко чоҥымо пашам ыштен коштын.
– 2022 ий сентябрьыште мобилизацийын икымше толкынжо тӱҥалмеке, спецоперацийыш каяш йодмашым пуэнам. Тунам 35 ияш марте гына налыт ыле, а мый 37 ийыш тошкалынам, сандене тидын шотыштат тургыжланенам. Ончыч вучалташ каласеныт, а 22 октябрьыште СВО-ш колтеныт. Шкеже лӱдын омыл, лач авам мыйын верч чот ойгырен.
Мый икымше ротыш логалынам, моло патыр рвезе-шамыч дене кокымшо линийыште шогенна. Тӱҥ задачына – икымше линийым страховатлаш, «кайыкым» (квадракоптерым) эскераш, тудын чоҥештен кайымыж нерген жапыште увертараш. Тыге кум сутка дене нарядыш коштынна, ик кече каненна. Южгунам утларак оролаш логалын.
Чоҥымаште пашам ыштымылан кӧра тусо условийыште илен лекташ утыжым нелын чучын огыл. Чылаланат тунемше лийынам. Тыгак мӧҥгӧ нерген шонымаш вийым пуэн.
Марий Эл, Мордовий Республикла да Санкт-Петербург, Пермь олала гыч йоча-шамычын серышыштым налме, мотор сӱретышт ден кумылаҥдыше мут-влак чонлан ласкалыкым пӧлеклат. Тыгак ӱдырамаш-влакын пидме носкишт, маскировочный сеткышт кугу полышым пуэныт. Шинчалтыме тӱрлӧ пакчаска ден вареньышт моткоч тамле. У ий пайремлан, Сеҥымаш да пӧръеҥ-влакын кечыштлан Обороно министерстве мыланна пӧлекым кучыктен. Тушто тушонко, сгущёнко, шоколад, пӱкш, чай да колбаса лийыныт. СВО-ш логалмеке, илышым, ешым чотрак йӧраташ тӱҥалынам,– ойла салтак.
Пӧръеҥ лишыл еҥже-влаклан арнялан ик гана йыҥгырташ тӧчен, чӱчкыдынрак йыҥгырташ йӧн лийын огыл, вет тушто кыл пеш начар. Отпускышто Н.Таныгин эше ик ганат лийын огыл.
Шке порысшым шуктымо годым Николайым осколко сусыртен. 27 январь гыч 20 февраль марте Оренбург олаште госпитальыште эмлалтын. Тудым ик тылзылан шочмо кундемышке реабилитацийыш колтеныт.
Вуй ӱмбалнына тек эре тыныс кава лиеш. Пелашыжым, иза-шольыжым, эргыжым вучышо кажне еҥ тек вашкерак шке геройжым вашлиеш.