Шернур район Шолэҥер ялын ӱдыржӧ, МарГУ-со Калыкле тӱвыра да тӱвыра кокласе коммуникаций институтышто 3-шо курсышто тунемше Олеся Танерова усталык шӱлышан, чолга улмыж дене ойыртемалтеш.
Студентке сайын тунемеш, тӱрлӧ вере шке мастарлыкшым нӧлтен толеш. Олеся ешан, шочшан лийын шуктен. Шым тылзаш Мирослав эргыже илыш дене тӧр каяш тудлан куатым ешара. Тиддеч посна ик ий ончыч, ешартыш шинчымашым налаш манын, тӱҥалтыш класслам туныктышылан тунемаш пурен. Йочам ончаш Алексей пелашыже полша, тудо ӱшанле эҥертыш.
Олеся ялже деч 5 меҥге тораште верланыше Марисола селасе школышто тунемын. Тунамак чулым, писе улмыж дене ойыртемалтын. Спорт дене кылым кучен.
«1-ше класс гыч теннис дене модаш тӱҥалынам. Кросслаште эре участвоватленам. Районысо, республикысе таҥасымашлаште ончыл верлашке чӱчкыдын лектынам», – ойла Олеся.
О.Танерова школ годсек мураш-кушташ, почеламутым сылнын лудаш йӧратен. Тӱрлӧ конкурсышто, олимпиадыште уш-акылжым терген.
«Йоча жап годсек почеламутым сылнын лудам, Колумб лудмашке эре ушненам. Изирак класслаште почеламутымат возен онченам. Но варажым шуко жапым тунеммылан ойыраш тӱҥалынам. Тыге чон йодмо паша мондалтын.
Шочмо йылмылан марий йылмым да литературым туныктышо Светлана Мартыновна Максимова кумылаҥден. Шочмо йылме дене школысо, районысо, республикысе олимпиадылаште ончыл верлашке лектынам. Варажым Озаҥ олаште эртаралтше Российысе олимпиадыште кокымшо вер дене палемдалтынам», – мане студентке.
Лач нине сеҥымаш-влак ӱдырым ончыкылык профессийым шочмо йылме дене кылдаш таратеныт. Туныктышо лияш чонжо ӱжын.
«9-ше классыште регионысо олимпиадыште участвоватлыме годым МарГУ-со Калыкле тӱвыра да тӱвыра кокласе коммуникаций институтын деканже Родион Чузавын выступленийже мыйым пуйто шулдыраҥдыш. Могай профессий мылам лишыл улмым тунам умыленам», – ойла Олеся.
Школым шӧртньӧ медаль дене пытарымеке, МарГУ-шко тунемаш каен. 1-ше курс гычак мер пашам шукташ тӱҥалын. Тудо волонтёр лийын, вузысо, оласе кугу мероприятийлаште полышкален.
Варажым «Марий мурсем» ансамбльын коллективышкыже ушнен да тӱрлӧ кундемышке гастроль дене миен. Озаҥ, Чебоксар, Нижний Новгород олалаште, тыгак республикысе тӱрлӧ районышко миен коштын.
Почеламутым сылнын лудмо мастарлыкшымат тыште ончыктен. Тыге ойыртемалтше ӱдыр туныктышо-влакын шинчашкышт пернен. Олесям яндар йӱкшылан кӧра институтысо мероприятийлам вӱдаш йодыныт. Тачысе кече марте тудо ты сомылым чоным пыштен шукта.
Олеся кажне кечын у шинчымаш дене пойдаралтеш, у кӱкшытышкӧ, сеҥымашке шуаш тырша. Олесялан умбакыжат тыгаяк тале, чолга кодаш тыланена.