Илыме йӧным саемдаш – 600 млн утла теҥгем

Э.Терентьеван фотожо.

Марий Эл Республикыште коммунальный инфраструктурысо системым уэмдымылан «Фонд развития территорий» компаний шке лимитшым пеҥгыдемден – 615 млн теҥгем. Тышеч 142 млн теҥгеже 2023 ийлан ойыралтын, 473,5 млн теҥгеже – вес ийлан.

Коммунальный озанлык, корным, илыме верым чоҥымо йодышлам 18 январьыште РФ-ште региональный вияҥмаш шотышто Правительственный комиссийын Президиумыштыжо каҥашыме. Тудым Правительстве Председательын алмаштышыже М.Хуснуллин эртарен. Зааседанийыште Марий Элым Вуйлатыше Ю.Зайцеват участвоватлен.

«Фонд развития территорий» компанийын финанс полышым 2027 ий марте пуымо правил да региональный программе почеш полшаш могай параметр-влак кӱлмӧ нерген РФ-н Чоҥымо паша да ЖКХ министрже И.Файзуллин каласкален.

Тылеч ончыч Ю.Зайцев республикысе коммунальный инфраструктурым уэмдыме йодышым федеральный кӱкшытыштӧ ик гана веле огыл нӧлталын, Ирек Файзуллин дене каҥашен.

Январьыште 2023-2027 ийлаште шуктышаш «Модернизация коммунальной инфраструктуры» проектым Фондышко колтымо. Тушко 8 водоснабжений ден 3 водоотведений объект-влак пурталтыныт.

Водозабор, инженерный сеть да канализационный коллектор-влакым Козьмодемьянскыште, Юрино, Медведево, Звенигово, Морко да Шернур районлаште уэмдат. 2023-2024 ийлаште ты программын проектше дене 746, 3 млн теҥгем палемдыме, тыгодым регионысо бюджет гыч софинансирований лиеш.