Медведево посёлкысо 3-шо номеран школын пырдыжшым у арт-объект сылнештара. Тушто тӱрлӧ курымысо виян полководец-шамычын портретыштым сӱретлыме. Арт-объектыште Георгий Жуковым, Михаил Кутузовым, Александр Невскийым, Александр Суворовым ончыктымо.
Ты пашан авторжо кундемыштына палыме сӱретче – Илья Белов. Художник арт-объектым «Лица Героев» Россий кӱкшытан калык проект негызеш ыштен. Военно-патриотический шӱлышан композицийлан барельеф-влак шкешотан ойыртемым пуртат. Нуным Медведево посёлкысо Воин чап монументым шотыш кондымо годым кораҥдыме да, ачален, шола велысе школ пырдыжыш келыштарыме.